Раст на „Ели Лили“ поради лек за слабеење кој се очекува да биде најдобар досега

Фармацевтската компанија „Ели Лили“ (Eli Lilly & Co.) прогнозира дека нејзината продажба во 2024 година ќе биде поголема од процените на пазарот, а компанијата се подготвува да ја интензивира продажбата на „зепбаунд“ (zepbound), лек за слабеење што се очекува да стане најпродаван во историјата.

„Зепбаунд“ беше претставен во декември, а продажбата веќе достигна 176 милиони долари во четвртиот квартал, се наведува во соопштението на производителот на лекови од Индијанаполис. Аналитичарите очекуваат лекот да донесе 2,41 милијарди долари годинава.

Акциите поскапеа дури за 5,5 отсто пред да се отворат американските пазари, а вредноста на акциите е двојно зголемена во последните 12 месеци. Со тоа, пазарната вредност на компанијата ќе достигне 700 милијарди долари.

Возбудата на инвеститорите поради лекот за слабеење ја направи компанијата највредна фармацевтска компанија во светот. Сепак, „зепбаунд“ е само дел од причината за оптимизам, бидејќи инвеститорите исто така се поттикнати од низа напредни лекови, вклучувајќи и инјекција што им помогнала на пациентите да изгубат околу една третина од нивната телесна тежина во испитувања.

„Иако цените на акциите на компанијата се повисоки во однос на остатокот од секторот, сепак очекуваме невиден раст во текот на следната деценија“, посочи во коментар аналитичарот на „ЏП Морган“ (JPMorgan), Крис Шот. Тој очекува продажбата на „зепбаунд“ и слични лекови да достигне 50 милијарди долари до 2030 година и да продолжи да расте. Аналитичарите во „Голдман Сакс“ (Goldman Sachs) предвидуваат дека вкупната продажба на лекови против дебелина ќе достигне 100 милијарди долари до 2030 година.

Тирзепатид, активната состојка во лековите „мунџаро“ (mounjaro) и „зепбаунд“, во една студија ги подобри симптомите на заболување на црниот дроб наречено неалкохолен стеатохепатитис или НАСХ (NASH). Аналитичарите внимателно ја следеа втората фаза од истражувањето бидејќи НАСХ претставува уште една можност за зголемување на приходите од продажба.

Проблеми со снабдувањето

„Ели Лили“ се соочува со недостиг од лекови поради зголемената побарувачка и инвестира во зголемување на понудата. Со оглед на времето што е потребно за производствените капацитети да станат целосно оперативни, компанијата соопшти дека очекува побарувачката да продолжи да ја надминува понудата во 2024 година.

Ривалот „Ново Нордиск“ (Novo Nordisk A/S) исто така се соочи со недостиг од снабдување на неговите лекови за слабеење „оземпик“ (оzempic) и „вегови“ (wegovy). „Ново Нордиск“ во понеделникот купи три фабрики за производство на лекови за 11 милијарди долари.

Вкупниот приход од продажбата на „Ели“ за годинава ќе биде од 40,4 до 41,6 милијарди долари, се наведува во соопштението на производителот на лекови, додека просечната проекција на аналитичарите беше 39,5 милијарди долари. Заработката за целата година ќе биде од 12,20 до 12,70 долари по акција, посочија од компанијата. Средината вредност на тој опсег е под просечната процена на аналитичарите од 12,56 долари по акција.

Во моментов нема коментари за веста. Биди прв да коментира...

Остави коментар