„Ново“ инвестира 11 милијарди долари за да го засили производството на „вегови“

Фармацевтската компанија „Ново Нордиск“ (Novo Nordisk A/S) ќе купи три фармацевтски погони во вредност од 11 милијарди долари за да го зголеми производствениот капацитет на лекот за слабеење „вегови“ (wegovy) и на лекот против дијабетес „оземпик“ (оzempic).

„Ново Нордиск“ ги купува погоните за полнење и стерилизација од својот мнозински акционер „Ново холдингс“, кој го купи сопственикот на погоните „Каталент“ (Catalent Inc.) за 16,5 милијарди евра.

Акциите на „Каталент“ пред почетокот на тргувањето скокнаа за 13 отсто, а акциите на „Ново Нордиск“, кои растат заедно со побарувачката на овие два лека, по објавувањето на веста напреднаа за 2,6 отсто.

Покрај побарувачката, расте и конкуренцијата за „вегови“, бидејќи лекот на „Ели Лили“ (Eli Lilly Co.), „зепбаунд“ (zepbound), неодамна доби регулаторно одобрение. Се шпекулира дека овој лек би можел да стане најпродаваниот во историјата, бидејќи предизвикува слабеење побрзо од кој било лек што „Ново“ го има развиено досега.

„Откупот на фабриките нема веднаш да ја подобри ситуацијата, бидејќи производството ќе се зголеми од 2026 година“, рече портпаролката на компанијата. Производствените капацитети се „тенки“, иако данската компанија имаше на располагање рекорден профит за да го зголеми производството.

Договорот со „Каталент“ имаше и поддршка од „Елиот инвестмент“ (Elliott Investment Managementa), хеџ-фонд што функционираше како т.н. акционер активист (англ. shareholder activist - акционер што преку поседување малцински удел се обидува да ги промени деловните практики во акционерско друштво н.з.). Според податоците од договорот, компанијата е купена за 63,5 долари по акција, што е за 16,5 отсто повеќе од цената на затворањето.

Bloomberg

Фабриките што ги купува „Ново Нордиск“ се наоѓаат во Индијана во САД, во Италија и во Белгија.

„Ова ќе ни овозможи да им помогнеме на повеќе луѓе со дијабетес во иднина“, рече извршниот директор на „Ново Нордиск“, Ларс Фројергард.

Имаше и други заинтересирани за преземање на „Каталент“, а минатата година се преговараше со „Данахер“ (Danaher Corp). Оваа компанија од Њу Џерси стана позната за време на пандемијата на ковид-19, кога произведуваше вакцини и лекови. Фабриката во Индијана во минатото имаше проблеми со регулаторите.

Ова исто така не е прв обид на „Ново Нордиск“ да го зголеми својот производствен капацитет. Кон крајот на минатата година компанијата соопшти дека ќе купи фабрики во Данска и во Франција. Минатата недела тие рекоа дека ќе ги удвојат дозите на „вегови“ што ги испраќаат во САД.

Освен зголемување на капацитетот, купувањето на фабриките ќе отвори повеќе можности и опции за производство за „Ново“, велат од компанијата.

Извршниот директор на „Каталент“, Алесандро Масели, на конференција во Сан Франциско, организирана од „ЏП Морган“ (JPMorgan) минатата недела, изјави дека компанијата ќе се фокусира на лекови како „вегови“. Тогаш рече дека очекува приходите на компанијата од продажба на вакви лекови да бидат за 500 милиони евра поголеми по инвестицијата.