„Мерцедес-Бенц“ (Mercedes-Benz Group AG) предупреди дека електричните возила (ЕВ) ќе останат поскапи од автомобилите со мотори со внатрешно согорување во наредните години, додека производителот на луксузни автомобили очекува побарувачката за електрични возила да се намали.
Производителот во четвртокот прогнозираше пониски приноси годинава, повикувајќи се на забавување на економијата. „Мерцедес“ ја намали и прогнозата за продажба на електрични возила, бидејќи побарувачка постои главно во сегментите на мали и средни возила, каде што брендот не е толку присутен.
Паритетот на варијабилни трошоци меѓу ЕВ и традиционалните автомобили „е далеку со години “, изјави извршниот директор Ола Калениус за телевизијата „Блумберг“. „Тоа може да го видите во цените“.
„Мерцедес“, сепак, порасна и до 4,6 отсто откако објави програма за откуп на акции во вредност од три милијарди евра (3,2 милијарди долари) поради поголемиот готовински тек од очекуваниот.
Извршниот директор најави можност за дополнителен откуп на акции.
Германската компанија планира да продаде повеќе луксузни автомобили, како „С класа“ (S-Class), за да го зголеми профитот и да ја финансира скапата транзиција кон електрични возила.
Производителот на автомобили долго време има корист од натрупаната побарувачка што помогна да се олеснат некои од економските предизвици. Но, тој очекува нарачките да се нормализираат годинава, бидејќи високите животни трошоци и задолжувањето го отежнуваат трошењето. Компанијата мора да се соочи и со притисок од честите намалувања на цените на автомобилите на „Тесла“ (Tesla).
„Макроопкружувањето е доста предизвикувачко“, изјави Калениус за ТВ „Блумберг“. „Сè уште го чувствуваме ефектот од повисоките каматни стапки, а Кина минува низ структурни предизвици“.
Производителот предвидува маржа во производството на автомобили од 10 проценти годинава. Профитабилноста лани беше 12,6 отсто.
„Мерцедес“ и неговите конкуренти стануваат повнимателни во врска со технологијата на батерии. Продажбата на целосно електрични автомобили годинава би требало да расте со најбавно темпо од 2019 година, според очекувањата на „Блумберг“. „Ауди“, кој е ривал на „Мерцедес“, кон крајот на минатата година соопшти дека го намалува својот план за производство на електрични возила.
Уделот на целосно електрични и плагин (plug-in) хибридни возила ќе остане приближно ист, помеѓу 19 и 21 отсто од продажбата на „Мерцедес“ годинава.
Производителот исто така ја намали својата среднорочна прогноза за технологијата и сега очекува електричните возила да сочинуваат половина од продажбата во втората половина на деценијата наместо во 2025 година.
Сите надежи на „Мерцедес“ се во неговата следна генерација електрични автомобили, кои се очекуваат околу средината на деценијата. Тоа вклучува електрична верзија на ЦЛА (CLA), модел од средна класа што минува повеќе од 750 километри со едно полнење, победувајќи го освежениот „тесла модел 3“ (Tesla Model 3).
„Мислам дека никој никогаш не помислил дека трансформацијата на автомобилската индустрија, која се случува еднаш во век, ќе биде права линија“, рече Калениус. „Ќе има врвови и долини“.
.webp){kind=icon}
Во моментов нема коментари за веста. Биди прв да коментира...