Вложувањето во акции „дебело“ му се исплати на „Гранит“

„Гранит“ АД Скопје лани оствари добивка од 152,5 милиони денари (2,4 милиони евра), што е зголемување за 15 проценти во однос на претходната година, кога добивката на компанијата изнесувала 132,8 милиони денари (2,1 милиони евра), покажува билансот на успех на компанијата објавен преку Македонската берза.

Од компанијата информираат дека вкупната сеопфатна добивка за 2023 година изнесува 436,7 милиони денари (7,1 милиони евра), што е зголемување од 203 проценти во однос на претходната година. Ваквото зголемување се должи на преостанатата сеопфатна добивка во износ од 284,2 милиони денари (4,6 милиони евра), која произлегува како резултат на евидентирана нереализирана добивка од зголемување на пазарната вредност на портфолиото акции што ги поседува друштвото во 2023 година.

Од „Гранит“ соопштија дека остварените единечни вкупни приходи во периодот јануари-декември 2023 година бележат зголемување за пет проценти во однос на претходната година, а приходите од продажба бележат зголемување за 10 проценти.  

Финансиските приходи лани бележат намалување за 17 проценти во однос на 2022 година. Остварените единечни  вкупни расходи споредено со истиот период во 2022 година бележат зголемување за пет проценти.   

„Постојната криза во Украина со Русија, енергетската криза со значајното зголемување на цените на главните енергенти и материјали (струја, гас, нафта, железо), нестабилноста на цените, како и стапката на инфлација, имаат и сè уште ќе имаат влијание врз светската економија, а следствено на тоа и врз македонската економија во наредниот период. Влијанијата ќе имаат ефект особено врз зголемувањето и нестабилноста на цените на одредени суровини и материјали, енергија, а преку тоа и врз крајните цени на многу производи“, посочуваат од компанијата.  

Оттаму додаваат дека друштвото континуирано ги следи движењата и се приспособува на состојбите на пазарот.

Во моментов нема коментари за веста. Биди прв да коментира...

Остави коментар