‚Сава пензиски фонд‘ ги продаде акциите од ‚Гранит‘

Отворениот задолжителен пензиски фонд „Сава пензиски фонд“  излезе од сопственичката структура на „Гранит“ откако на јавна аукција одржана минатата недела на Македонската берза беше продаден пакет од 236.120 акции од градежната компанија. Пакетот акции, што претставуваше 7,69 проценти од сопственоста на „Гранит“ се продаде по цена од 1.450 денари за акција односно за вкупна сума од 342 милиони денари (околу 5,5 милиони евра).

Според најновите податоци од Централниот депозитар за хартии од вредност, „Сава пензиски фонд“ кој поседуваше 7,51 проценти од „Гранит“ веќе не се јавува во евиденцијата на акционери кои поседуваат над пет проценти од сопственоста на компанијата.

Заклучно со 17.10.2022, најголеми поединечни акционери во „Гранит“ остануваат Ивана Милковска-Симева со сопственост на 8,84 проценти од вкупниот број акции, Зоран Милковски, кој поседува 8,67 проценти од акциите и ГД „Гранит“ (9,81 проценти).

„Блумберг Адриа“ во изминатиов период во неколку наврати пишуваше за раздвижена динамика во тргувањето со акциите на „Гранит“. Во трансакциите како купувачи се јавуваа менаџерите на компанијата. 

Во моментов нема коментари за веста. Биди прв да коментира...

Остави коментар