.webp){kind=icon}
Компанијата „Тесла“ (Tesla Inc.) можеби е на пат кон мрачна пресвртница бидејќи намалената побарувачка за електрични возила (ЕВ) и високите каматни стапки влијаат на продажбата.
Како што се приближуваше крајот на првиот квартал, аналитичарите брзо ги намалија своите проекции за овонеделниот извештај за испораките на возила од „Тесла“. Некои на Волстрит дури се подготвуваат за првиот пад на продажбата на компанијата од раните денови на пандемијата.
Во просек, аналитичарите анкетирани од „Блумберг“ процениле дека „Тесла“ испорачала 453.964 возила во кварталот. Тоа би било пад за повеќе од шест отсто во однос на рекордот на компанијата поставен во четвртиот квартал од минатата година, кој обично е најдобриот период од годината за продажба. Би било од клучно значење за компанијата да испорача повеќе од 422.875 автомобили што ги испорача во првите три месеци од 2023 година и да го избегне првиот пад од година на година уште од вториот квартал на 2020 година.
Аналитичарите ги намалија процените за „Тесла“ за првиот квартал
И самиот Илон Маск можеби не помогна за ситуацијата во последната недела од март. Главниот извршен директор на „Тесла“ наметна нова директива, за која тој признава дека ќе го забави процесот на продажба, барајќи секој клиент во Северна Америка да се води на кратки возења за да ја тестира функцијата за асистирање на возачот, која „Тесла“ погрешно ја промовира како опција за целосно автономно возење.
„Тесла“ почна да нуди бесплатен едномесечен пробен период на функцијата, која вообичаено чини 199 долари месечно како претплата или 12.000 долари за еднократно купување. Тоа беше една од неколкуте поволности што компанијата ги понуди за привлекување клиенти, заедно со привремени попусти од 1.000 долари и бесплатно полнење. „Тесла“ исто така го засили рекламирањето на Гугл и X, социјалната мрежа во сопственост на Маск.
Емануел Роснер од „Дојче банк“ ги намали своите процени за испораките двапати минатиот месец, за нешто повеќе од две недели. Тој сега очекува да се покаже дека компанијата продала околу 414.000 автомобили во првиот квартал, што е за околу два отсто помалку од пред една година.
„Дојче банк“ ја намали процената на вредноста под онаа што беше забележана пред една година
Инаку, Маск во јануари ги предупреди инвеститорите дека компанијата е меѓу два големи брана на раст. Првиот беше поттикнат од „модел 3“ во форма на седан и „модел Y“ - спортско теренско возило, а следниот раст се очекува по лансирањето поевтино возило од следната генерација, чие производство треба да започне на крајот од 2025 година. Но, со оглед на тоа што автомобилот од следната генерација сè уште е далеку, некои аналитичари стравуваат дека изгледите на „Тесла“ за значително пониска стапка на раст годинава може да се рефлектираат во отсуство на раст во првиот квартал.
Во Кина, „Тесла“ се бори да остане во чекор со БЈД (BYD Co), која на крајот на минатата година стана најпродаваниот светски производител на електрични возила. Американскиот производител на автомобили им наложил на вработените во својата фабрика во Шангај минатиот месец да го намалат производството работејќи пет дена во неделата наместо вообичаените шест и пол дена, изјавија за „Блумберг њуз“ луѓе запознаени со ова прашање.
„Модел 3“ и „модел Y“ сочинуваа 96 отсто од глобалните испораки на „Тесла“ минатата година. Компанијата ги произведува и „моделот S“ (седан) и „моделот Х“ (теренец), а со продажба на „сајбер трак“ започна на крајот на минатата година, иако останува да се види какви ќе бидат резултатите од продажбата.
