Драстичен раст на приходите, добивката и вработувањата во ‚Алкалоид‘

„Алкалоид“ АД Скопје ги објави резултатите од работењето во првата половина од годинава од кои може да се види дека компанијата имала одлично полугодие и покрај отежнатите услови за работа.

Остварените единечни вкупни приходи во периодот јануари-јуни 2022 година изнесуваат 5.704.753.000 денари и во споредба со остварените во истиот период во 2021 година бележат раст од 13 проценти. Во структурата на вкупните приходи најголемо учество, 93 проценти, имаат приходите остварени со продажба на производи и на услуги, кои во споредба со остварените во 2021 година бележат раст од 10 проценти.

Остварените консолидирани вкупни приходи во периодот јануари-јуни 2022 година изнесуваат 7.501.994.000 денари (122 милиони евра) и во споредба со остварените во истиот период во 2021 година бележат раст од 16 проценти. Во структурата на вкупните приходи, најголемо учество, 95 проценти, имаат приходите остварени со продажба на производи и на услуги, кои во споредба со остварените во 2021 година бележат раст од 14 проценти.

Остварените единечни вкупни расходи во периодот јануари-јуни 2022 година изнесуваат 4.955.336.000 денари и во споредба со остварените во истиот период во 2021 година бележат раст од 12 проценти. Остварените консолидирани вкупни расходи во периодот јануари-јуни 2022 година изнесуваат 6.748.401.000 денари и во споредба со остварените во истиот период во 2021 година бележат раст од 17 порценти.

Поголем извоз, зголемена добивка и 127 нови вработувања

Од вкупните консолидирани продажби, 68 проценти се остварени на странските пазари. Најголем пораст кај извозните пазари бележат продажбите остварени во земјите од Источна Европа (раст од 59 проценти) и во земјите од Западна Европа (раст од 24 проценти).

Остварената единечна нето-добивка во 2022 година изнесува 683.064.000 денари и во споредба со остварената во 2021 година бележи зголемување за 16 проценти.

Остварената консолидирана нето-добивка во 2022 година изнесува 649.427.000 денари (10,5 милиони евра) и во споредба со остварената во 2021 година бележи зголемување за 11 проценти.

Во периодот јануари-јуни 2022 година во „Алкалоид“ се реализирани 127 нови вработувања.

„Со одлука на Управниот одбор на „Алкалоид“ АД Скопје, во март 2022 година е одобрен и исплатен регрес за користење годишен одмор за вработените во компанијата во висина од нето износ од 30.000 денари. Групацијата „Алкалоид“ брои 2.609 вработени, од кои 2.011 се во базата во Скопје, а 598 се вработени во подружниците во странство“, информираат од компанијата.

Оттаму додаваат дека ба 4 април 2022 година, на Годишното собрание на акционерите, е одобрена пресметка и исплата на брутодивиденда за 2021 година, во износ од 629.795.000 денари, односно 396 денари нето за една акција што во однос на исплатената дивиденда по акција за 2020 година од 360,00 денари нето е поголема за 10 проценти.

Вкупните инвестиции во основни средства во периодот јануари-јуни 2022 година изнесуваат 490.008.000 денари.

Бизнис план и очекувања

Бизнис-планот за 2022 година, донесен со одлука на Управниот одбор на „Алкалоид“ предвидува инвестирање на околу 14 проценти од консолидираните приходи од продажбите во материјални и во нематеријални средства, раст од 8 проценти на консолидираните продажби во однос на 2021 година, како и раст од 7 проценти на консолидираниот профит пред оданочување во однос на 2021 година.

„Бизнис-планот за 2022 година е базиран на очекувањата, проекциите и на можностите на тековните и на новите пазари и производи, достапни за компанијата во моментот на изготвување на планот. Околностите и настаните во 2022 година, а со тоа и остварените резултати, може да варираат од прикажаните во бизнис-планот“, објаснуваат .

Од компанијата укажуваат дека во изминатиот период се соочиле со голем број интерни и екстерни предизвици и новонастанати ризици, генерирани од пандемијата на КОВИД-19.

„Презедовме голем број мерки во досегашниот период, со цел неутрализирање на сите негативни ефекти, без притоа да се загрози здравјето на вработените и успешното работење на друштвото. Во согласност со очекувањата, уште во текот на минатата година здравствената криза се претвори и во економска, а со тоа се појавија и нови предизвици во работењето. Она што како тренд започна во 2021 година, а ќе доминира и во 2022 година е забележителниот раст на цените на голем дел од влезните суровини и материјали, енергенсите, како и порастот на цените на транспортот на глобално ниво, а особено и значителните пролонгирања на роковите за испорака. Сето ова веќе започна да влијае и на стапката на инфлацијата што веројатно како тренд ќе биде уште понагласен во периодот што следи“, велат од компанијата.

Оттаму додаваат дека земајќи го предвид конфликтот помеѓу Русија и Украина, започувајќи од 24 февруари 2022 година, „Алкалоид“ АД Скопје превзема неопходни мерки за заштита на инвеститорите, купувачите и вработените обидувајќи се да им овозможи безбедни услови.

„Како најголем предизвик и прв приоритет за периодот што доаѓа и понатаму останува грижата за здравјето на вработените, како и одржувањето на тековната ликвидност, на финансиската стабилност и остварување на планските цели.“, соопшти компанијата. 

Во моментов нема коментари за веста. Биди прв да коментира...

Остави коментар