Авиокомпанијата „Рајанер“ (Ryanair Holdings Plc) соопшти дека цената на билетите во врвот на летната сезона во Европа би можела да остане „рамна“ или „скромно да се зголеми“, при што операторот ќе мора да ги намали цените во трите месеци до јуни за да ги зголеми резервациите.
Ирската компанија во понеделникот посочи дека со оглед на ограничената видливост, премногу е рано да се дадат насоки за финансиската година на „Рајанер“ што започна од април 2024 година. Оттаму посочија дека побарувачката е добра, но европскиот капацитет за кратки дестинации е ограничен.
„Се чини малку контраинтуитивно дека цените на билетите не се зголемуваат повеќе отколку што се во моментов, со оглед на капацитетот“, рече во интервју финансискиот директор Нил Сорахан.
Превозникот најави и откуп на акции во износ од 700 милиони евра, откако пријавената добивка по оданочување за 2024 година се зголеми за 34 отсто, на 1,92 милијарда евра. Во последните 12 месеци бројот на патници е зголемен на 184 милиони, 23 отсто повеќе од нивото пред ковид-19.
Инвеститорите побараа насоки од „Рајанер“ за цените, откако главниот извршен директор Мајкл О'Лири минатата недела изјави дека очекува цените во летната сезона да бидат пониски од претходните процени.
Ривалот „Изиџет“ (EasyJet Plc) минатата недела изјави дека сè уште е рано да се утврдат цените, бидејќи досега биле продадени само 39 отсто од резервациите за шпицот на сезоната.
„Рајанер“ соопшти дека летово ќе биде „покус“ за 23 нови авиони „737 макс“ (од „Боинг“) и предупреди дека испораките би можеле дополнително да паднат. Генерално, авиокомпанијата е задоволна од новата шефица на одделот за комерцијални авиони на „Боинг“, Стефани Поуп, и нејзиниот тим во Сиетл, вели Сорахан.
„Секогаш постои ризик нешто да се случи во фабриката и тоа да ги забави работите“, рече тој. „Мора да бидеме многу внимателни бидејќи досега имавме многу одложувања“.
„Рајанер“ се мачи да ги набави сите свои авиони „макс 200“, додека „Боинг“ се соочува со интензивна контрола од регулаторите, законодавците и клиентите по проблемите со неговиот авион „737 макс“ во јануари. Тие одложувања го принудија „Рајанер“ да ги намали годишните прогнози за бројот на патници и фреквенциите на летови во својата мрежа.
.webp){kind=icon}
