Кинеската БЈД (BYD Co.), која на хибридниот пазар им конкурира на „Тојота“ и на „Фолксваген“, го претстави новиот систем за пренос за хибридни модели што ќе им овозможи на возилата да поминат повеќе од 2.000 километри без полнење на батериите или полнење гориво.
Новата технологија, која БЈД сака да се издвои од своите ривали, ќе биде веднаш достапна во две лимузини (седани) што чинат помалку од 13.800 долари, рече производителот на автомобили за време на презентација во живо.
Тоа значи дека новите хибриди би можеле да одат од Сингапур до Бангкок, од Њујорк до Мајами или од Минхен до Мадрид со наполнета батерија и полн резервоар. Ова е најголемиот чекор што го направи БЈД од претставувањето на хибридните модели во 2008 година.
Bloomberg
Компанијата од Шенжен предизвика бурни реакции на кинескиот пазар на електрични автомобили со своите попусти (на сметка на сопствената профитабилност), а новите хибриди би можеле дополнително да ја засилат ценовната војна. Минатата година БЈД продаде три милиони автомобили, а до крајот на април годинава продаде уште еден милион. На секои два продадени хибриди во Кина, еден е БЈД.
Акциите на БЈД во Хонгконг скокнаа за четири отсто во средата.
Производителите на автомобили се обидуваат да го зголемат растојанието што можат да го поминат моделите, притоа зачувувајќи ја природната средина. Во вторникот „Тојота“ ги претстави прототипите на новата генерација модели со внатрешно согорување, кои освен на батерии, можат да работат и на бензин или водород.
За време на презентацијата, БЈД соопшти дека овие хибридни модели можат да поминат до 2.500 километри. Засега овие модели се продаваат во Кина, но најверојатно ќе бидат наменети и за извоз.
Производителите на електрични автомобили и хибриди се обидуваат да ја зголемат километражата што може да се помине со едно полнење бидејќи тоа е многу важна ставка што ги тера потрошувачите да се преиспитаат за префрлањето на овој тип гориво.
На почетокот на 2022 година, БЈД престана да произведува автомобили со фосилни горива и сè повеќе ги извезува своите хибриди во земјите во развој во кои нема инфраструктура за полнење електрични автомобили.
Првите два модела со овој систем за пренос се седани со средна големина - „лин Л“ и „сеал 06“. И двата модела беа претставени во Пекинг во април.
.webp){kind=icon}
