„Нокиа“ (Nokia Oyj) се согласи да ја купи „Инфинера“ (Infinera Corp.) во договор од 2,3 милијарди долари, што ќе ги прошири мрежните производи на компанијата насочени кон центрите за податоци и треба да го зголеми нејзиното присуство во САД. Тој пазар е потенцијално клучен извор на раст за „Нокиа“, бидејќи бумот на вештачката интелигенција (ВИ) ја поттикнува побарувачката за нејзините услуги.
„ВИ во моментов поттикнува значителни инвестиции во центрите за податоци, а една од клучните атракции на оваа аквизиција е тоа што значително ја зголемува нашата изложеност на центрите за податоци“, рече Пека Лундмарк, извршен директор на „Нокиа“.
Изложеноста на „Инфинера“ на „комуникации од сервер до сервер“ во центрите за податоци е особено атрактивна, бидејќи „ќе биде еден од најбрзорастечките сегменти на севкупниот пазар за комуникациска технологија“, се додава во соопштението.
Преземањето го проценува капиталот на производителот на телекомуникациски оптички влакна на 6,65 долари по акција, соопштија компаниите доцна во четвртокот. Најмалку 70 отсто од сумата ќе се плаќа во готово, а остатокот ќе се состои од американски депозитни акции на „Нокиа“, се наведува во соопштението што го потврди претходниот извештај на „Блумберг њуз“.
Акциите на „Инфинера“ пораснаа за 15 отсто во изминатите 12 месеци, што ѝ дава пазарна вредност од околу 1,2 милијарда долари. Акциите, кои во четвртокот затворија на 5,26 долари, скокнаа за околу 20 отсто во претпазарното тргување во петокот, пред отворањето на американскиот пазар.
Акциите на „Нокиа“ поскапеа за 1,1 отсто, на 3,54 евра, околу пладне во Хелсинки.
Bloomberg Mercury
Продажбата на „Нокиа“ и нејзиниот ривал „Ериксон“ (Ericsson AB) е погодена од драматично намалување на побарувачката за мобилни мрежи додека индустријата се бори да ги врати вложувањата. „Нокиа“ исто така претрпе голем удар кога „Ериксон“ обезбеди договор од 14 милијарди долари со AT&T Inc. во декември за изградба на мрежа OpenRAN, технологија што е попријатна за облак и ги отвора мрежите повеќе од претходните силно интегрирани решенија.
Договорот, најголемиот на „Нокиа“ од купувањето на „Алкател“ (Alcatel-Lucent) во 2016 година за 10,6 милијарди евра, треба да помогне во изградбата на бизнисот со фиксна телефонија, кој компанијата очекува да расте во втората половина од годината бидејќи клиентите ги зголемуваат нарачките за технологија што се користи во облак-инфраструктура.
.webp){kind=icon}
