PwC започна со масовни отпуштања во Кина откако загуби повеќе клиенти

Компанијата PricewaterhouseCoopers LLP (PwC) го намалува персоналот низ своите претставништва во Кина, според луѓе запознаени со ова прашање, откако егзодусот на корпоративни клиенти ги намали изгледите за приходи на сметководствената фирма во земјата.

Најмалку 100 вработени од различни тимови во канцелариите на PwC Кина во Пекинг, Шангај и други локации се пуштени да си заминат, велат изворите, барајќи да не бидат идентификувани бидејќи станува збор за приватни работи. Повеќе од половина од еден тим бил отпуштен, според еден од изворите. Конечниот исход од кратењата низ целата фирма не е веднаш јасен.

„Со оглед на промените во надворешното опкружување, правиме некои прилагодувања за подобро да ја оптимизираме нашата организациска структура за да се усогласиме со побарувачката на пазарот“, рече портпаролот на PwC како одговор на прашањата од „Блумберг њуз“ (Bloomberg News). Фирмата не даде детали за бројот на вработени кои ќе бидат отпуштени.

„Овие прилагодувања се тешка одлука. Активно комуницираме со нашите луѓе и ќе се погрижиме планот да биде во согласност со сите релевантни закони за работни односи во Кина“, додаде портпаролот.

Повеќе од 30 јавно котирани компании со седиште во Кина се откажаа од услугите на PwC како нивен ревизор оваа година. Многу од промените се случија откако фирмата се најде под лупа поради нејзината улога во наводна сметководствена измама кај инвеститорот „Евергранд“ (China Evergrande Group).

Регулаторите ја испитуваа улогата на PwC и нејзините сметководствени услуги за „Евергранд“, откако инвеститорот беше обвинет дека ги зголемил приходите за 78 милијарди долари од 2019 до 2020 година. Кинеската Регулаторна комисија за хартии од вредност вети дополнителни истраги за „посредничките агенции“ вклучени во случајот.

Властите одмеруваат рекордна казна од најмалку 1 милијарда јуани (138 милиони долари) за PwC и би можеле да прекинат некои од нејзините операции во континентална Кина, објави „Блумберг њуз“ во мај.

Претставништвото на PwC на копното, PricewaterhouseCoopers Zhong Tian LLP, имаше 291 партнер и повеќе од 1.700 сметководители на крајот на минатата година, според регулаторните документи. Фирмата беше најголем заработувач меѓу сметководствените фирми во Кина во 2022 година и пријави 7,9 милијарди јуани приход таа година, според официјалните податоци. Ревидираше околу 400 кинески фирми корирани во Шангај, Шенжен, Хонгконг или Њујорк.

PwC претходно овој месец го назначи Даниел Ли, партнер со седиште во Шангај, за свој нов претседавач со Азија Пацифик и Кина. Се вели дека тој е првиот лидер од континентална Кина на таа позиција.

Во моментов нема коментари за веста. Биди прв да коментира...

Остави коментар