„Блекрок“ вели дека напаѓачот на Трамп се појавил во рекламата на компанијата

Томас Метју Крукс, 20-годишниот напаѓач кој пукаше и го повреди поранешниот претседател Доналд Трамп на митинг во Пенсилванија, накратко се појави во реклама за „Блекрок“ (BlackRock Inc.), соопшти компанијата.

Крукс беше еден од неколкуте студенти кои се појавија во позадината на рекламата во 2022 година и беа неплатени, се вели во соопштението на „Блекрок“, најголемиот светски менаџер на пари. Рекламата е снимена во средното училиште „Бетел Парк“, каде што Крукс завршил во 2022 година, а во неа бил вклучен и учител, соопшти компанијата.

Компанијата не ја опиша содржината на рекламата, но рече дека снимката ќе им биде достапна на властите и дека ќе биде отстранета од оптек. Исто така, го осуди нападот во во кој загина еден од присутните, а двајца беа тешко ранети.

„Обидот за атентат врз поранешниот претседател Трамп е одвратен. Благодарни сме што поранешниот претседател Трамп не беше сериозно повреден и размислуваме за сите невини случајни минувачи и жртви на овој грозен чин, особено за лицето кое беше убиено“, се вели во соопштението.

Компанијата во минатото беше под лупа по престрелките во САД, бидејќи дел од нејзините индексни фондови вложуваат во акции на производители на оружје.

 

Во моментов нема коментари за веста. Биди прв да коментира...

Остави коментар