„Адико банка“: ЕЦБ им го суспендира правото на глас на две компании

Европската централна банка (ЕЦБ) го суспендира правото на глас во австриската „Адико банка“ (Addiko bank) на компаниите „Алта пеј груп“ (Alta Pay Group) на Давор Мацура и „Дипломат пеј“ (Diplomat Pay) на Стефан Родиќ бидејќи смета дека двајцата акционери дејствувале заедно и не ги информирале регулаторите дека стекнале квалификуван удел, се наведува во соопштението објавено на веб-страницата на австриската банка.

Станува збор за заедничко дејствување при стекнување квалификуван удел во вкупен износ од 19,62 отсто од акциите на „Адико банка“, се прецизира во соопштението. Всушност, тоа се однесува на 9,63 отсто од акциите во банката што ги поседува банкарската и финансиска групација „Алта пеј“ и 9,99 отсто од акциите на платежната институција „Дипломат пеј“.

„Адико банка“, која има филијали речиси во сите земји од регионот, го објави ова соопштение повикувајќи се на известување што го добила од ЕЦБ во вторникот. Според „Блумберг“, суспензијата на правото на глас ќе се однесува на сите дополнителни акции што ги стекнале двајцата инвеститори, а ЕЦБ ќе побара од трговскиот суд во Виена да назначи управник за суспендираното право на глас.

Претставник на „Алта пеј“ одби веднаш да го коментира случајот за „Блумберг“.

Да потсетиме, „Алта пеј“ влезе во конкуренција за стекнување сопственички удел во „Адико банка“ за да стекне учество од 29,59 отсто од акциите. Во трката годинава влегоа и Миодраг Костиќ преку „Агри Европа Кипар“ и „Нова љубљанска банка“ (НЛБ), која неодамна ја подигна својата првобитна понуда. Компанијата на Костиќ, која веќе има удел од 9,99 отсто, има цел да стекне уште 17 отсто. Целта на НЛБ, пак, е да купи најмалку 75 отсто. Во меѓувреме, менаџментот на „Адико“ неодамна му ги вети акциите на словенечкиот купувач.