„Амазон“ најави крај на работата оддома и укинување на непотребните процеси

Извршниот директор на „Амазон“ (Amazon.com Inc.), Енди Џеси, е насочен кон рационализација на најголемата светска компанија за онлајн продажба и компјутери во облак, со помалку слоеви на управување и наредба за вработените да работат во канцеларија пет дена во неделата, почнувајќи од јануари.

Промената, објавена во белешка до вработените во понеделникот, го одразува она што со години се шпекулира меѓу ветераните на компанијата - станува сè потешко да се заврши работата односно да се сработи нешто во „Амазон“. Приказните за бескрајно размислување, непотребни состаноци и нивоа на одобрување станаа вообичаени во оваа компанија, чија структура почнува да личи на збирка тимови задолжени да работат како стартапи.

Џеси наведува некои од овие феномени во својата белешка, посочувајќи на „претсостаноци за претсостаноците за состаноци за одлучување, долга низа менаџери што сметаат дека треба да прегледаат нешто пред да продолжат напред, иницијатори што не се чувствуваат одговорно дека треба да дадат свои препораки бидејќи одлуката секако ќе биде донесена на друго место“.

„Секоја голема организација во рамките на „Амазон“ се очекува да го зголеми соодносот меѓу поединечните соработници и менаџерите за 15 отсто до крајот на март 2025 година“, рече Џеси. Тој најави и бирократски совет за вработените да изразат загриженост за непотребните процеси.

„Сакаме да работиме како најголем стартап во светот“, истакна тој во својата порака, објавена на корпоративниот блог на „Амазон“. „Тоа значи да имате страст за постојано иновирање за клиентите, силно чувство за итност (за повеќето големи можности, има вистинска трка!), но исто така и за преземање одговорност, брзо донесување одлуки, штедливост и за длабоко поврзана соработка (треба да се здружите со вашите соиграчи кога иновирате и решавате тешки проблеми), како и заедничка посветеност еден на друг“.

Енди Џеси Bloomberg

Тоа значи и крај на релативната флексибилност на „Амазон“ во однос на тоа каде вработените ги вршат своите задолженија.

Претходно „Амазон“ бараше од вработените да се пријават во канцеларијата најмалку три дена во неделата, во зависност од барањата на нивниот тим. Новите планови на „Амазон“ ќе овозможат одредени исклучоци за неопходни олеснителни околности за работниците или случаи кога менаџерите веќе одобриле целосна работа од далечина и вработените ќе имаат неколку месеци да се подготват, рече Џеси.

„Разбираме дека некои од нашите соиграчи можеби го организирале својот приватен живот на таков начин што за постојано враќање во канцеларија пет дена во неделата ќе бидат потребни одредени приспособувања“, напиша Џеси.

Повеќето од околу 1,5 милион вработени на „Амазон“ низ светот се вработени врз основа на бројот на часови што ги поминуваат при подигнување предмети и испраќање пакети - за нив работата од далечина никогаш не била опција. Но компанијата вработува стотици илјади канцелариски работници - имаше приближно 350.000 пред најголемите отпуштања досега, кои започнаа кон крајот на 2022 година.

Bloomberg

Оваа вест веројатно ќе значи зголемен сообраќај во градовите во кои работи „Амазон“. Тука спаѓаат Сиетл (каде што компанијата е убедливо најголемиот корпоративен закупец), вашингтонското предградие Белви, како и места како Арлингтон, Вирџинија, заливската област на Сан Франциско, Остин, Бостон и Нешвил.

Претходните напори на компанијата да ги врати работниците во канцеларија наидоа на отпор од страна на некои вработени, кои ја обвинија дека е нефлексибилна и дека не обезбедила податоци што покажуваат дека работата од канцеларија дава подобри резултати.

„Одржувањето силна култура на компанијата не паѓа од небо“, напиша Џеси. „Треба постојано да се работи на тоа“.