„Амазон“ (Amazon.com Inc.) воведува четбот за бизнис наречен Амазон кју (Amazon Q), кој е дизајниран да им помогне на корпоративните клиенти да бараат информации, да пишуваат кодови и да ги прегледуваат деловните метрики.
„Амазон веб сервисис“ (АВС), подружницата на „Амазон“ за компјутери во облак, воведува генеративна вештачка интелигенција (ВИ) на повеќе производи, обидувајќи се да го врати водството во полето во кое доминираат нејзините главни ривали. „Мајкрософт“ (Microsoft Corp.) и „Гугл“ (Google) на „Алфабет“ (Alphabet Inc.) веќе најавија дека ќе направат нешто слично.
Постојните четботови со генеративна вештачка интелигенција се „навистина суперкорисни за потрошувачите“, рече извршниот директор на АВС, Адам Селипски, во вторникот на „Риенвент“ (re:Invent), конференција на компанијата во Лас Вегас. „Но, на многу начини, овие апликации навистина не функционираат на работа“.
АВС, најголемиот светски продавач на изнајмена компјутерска моќ и складирање податоци, во последниве години не мораше многу да се докажува на својот саем, каде што најавува нови производи на десетици илјади развивачи на софтвер и деловни лидери. Но минатогодишниот настан беше во сенка на објавувањето на ЧетГПТ (ChatGPT) на „Опен еј-ај“ (OpenAI). Технологијата брзо ги воодушеви корисниците со својата способност да генерира текст и слики што се слични како да ги направил човек, со помош на т.н. големи јазични модели, кои се обучени преку огромни количества на податоци.
Bloomberg Adria
„Мајкрософт“, најблискиот ривал на „Амазон“ во однос на технологијата на облак, инвестираше милијарди во „Опен еј-ај“, обезбедувајќи ексклузивно партнерство за облак-производите на стартапот. „Гугл“ исто така се приклучи во трката со своите производи со генеративна вештачка интелигенција, како во апликациите за потрошувачи, како што е пребарувањето, така и за бизнисите што се потпираат на неговите центри за податоци.
„Амазон“, и покрај децениското искуство за софтвер дизајниран да учи од шаблони, се најде во борба да докаже дека може да се натпреварува во оваа нова арена. Во текот на годинава компанијата ја објави Бедрок (Bedrock), софтверска алатка дизајнирана да го олесни пристапот до големи јазични модели од други компании, како и некои нови модели од „Амазон“, а софтверот доби мешани критики.
Неделава компанијата го засили својот одговор на критиките со серија нови производи и коментари од компании што го користат софтверот на „Амазон“ за апликации со вештачка интелигенција. „Амазон“ соопшти дека Бедрок има повеќе од 10.000 клиенти, вклучувајќи го и „Фајзер“ (Pfizer Inc.), кој има намера да го користи производот за да идентификува потенцијални аквизиции и да открие аномалии во производството.
„Амазон“ исто така објави нови верзии на своите домашни чипови, вклучувајќи ги и оние што се наменети за апликации со вештачка интелигенција, и ја продлабочи својата врска со „Енвидија“ (Nvidia Corp.), водечки снабдувач на чипови во сферата на вештачката интелигенција. Дарио Амодеи, извршен директор на стартапот за вештачка интелигенција „Антропик“ (Anthropic), поддржан од „Амазон“ со околу 4 милијарди долари, и Џенсен Хуанг од „Енвидија“ му се придружија на Селипски на сцената на конференцијата.
Во интервју за телевизијата „Блумберг“, Селипски го промовираше партнерството на „Амазон“ со „Антропик“.
„Ќе донесат моќни функции во однос на финото нагодување и приспособување, кои, за одреден временски период, ќе бидат достапни само на АВС и директно преку ’Антропик’“, рече тој. „Не преку кој било друг облак. Значи, врската е длабока, силна и не е променета“.
Амазон кју, кој е делумно обучен за внатрешниот код и документација на АВС, ќе биде достапен за програмерите што го користат облакот на компанијата. Ќе биде додаден и во софтверот за деловна интелигенција на Амазон, како и програмите за работници во центрите за повици и за менаџерите за логистика. Компанијата соопшти дека асистентот може да се приспособи за да ги земе предвид корпоративните податоци или профилот на поединецот. За почеток, Кју ќе чини 20 долари по корисник месечно.
.webp){kind=icon}
