„Орка Холдинг“ плати 1,7 милиони евра за акциите на „Софија градба“ во ЗК„Пелагонија“

„Орка Холдинг“ е купувачот на 46.046 акции од ЗК „Пелагонија“ кои пред десет дена беа истргувани преку Македонската берза во блок-трансакција вредна 106,7 милиони денари (1,7 милиони евра). „Блумберг Адрија“ веќе пишуваше дека станува збор за трансакција со акции коишто претставуваат 22,69 проценти од основната главнина на друштвото. Акциите се продадоа по цена од 2.319 денари за акција (37 евра), што е речиси двојно помалку од нивната номинална вредност од 70,21 евро.

Податоците на Централниот депозитар за хартии од вредност покажуваат дека по оваа трансакција „Софија градба“ која поседуваше 22,69 проценти од акциите повеќе не е дел од сопственичката структура на комбинатот, а на нејзино место е евидентирана „Орка Холдинг“, која што е нов сопственик на овие акции. Интересно е што последниот ревизорски извештај за „Орка Холдинг“ покажува дека „Софија градба“ е нејзина подружница.

Инаку, според податоците на Централниот депозитар за хартии од вредност, заклучно со 23 септември годинава, меѓу акционерите кои поседуваат над пет проценти од акциите во компанијата се Златко Пирузе кој е сопственик на 17,55 проценти од вкупниот број обични акции, Снежана Георгиева(5,19 проценти), „Орка Холдинг“ (22,69 проценти), „Нова агро инвест“ (9,86 проценти), Дејан Панделески (5,20 проценти) и Цветан Панделески (14,59 проценти).   

Во моментов нема коментари за веста. Биди прв да коментира...

Остави коментар