Производството на „Тојота“ паѓа по скандалот за безбедноста на автомобилите

Продажбата на компанијата „Тојота“ (Toyota Motor Corp.) повторно опадна откако падот на продажбата во Јапонија и во Кина го прекина краткотрајното закрепнување, додека производството беше попречено од внатрешни скандали и повлекување возила од странство.

Глобалното производство, вклучувајќи ги и филијалите „Дајхацу“ (Daihatsu Motor Co.) и „Хино“ (Hino Motors Ltd.), во август опадна за 12,6 проценти во однос на претходната година, на 808.023 автомобили, соопшти компанијата во петокот. Глобалната продажба опадна за 3,7 проценти во споредба со истиот период минатата година, по пораст од 0,7 проценти во јули.

Продажбата на „Тојота“ опадна за повеќе од девет проценти во Јапонија, бидејќи компанијата почувствува одложен ефект од неодамнешните регулаторни скандали поврзани со фалсификувани сертификати за безбедност на возилата, што наметна запирање на производството на таквите модели.

Нејзините хибридни автомобили повторно станаа популарни, додека побарувачката за електрични возила стагнираше, но глобалниот пад на продажбата на нови автомобили и интензивната конкуренција во Кина го оптоваруваат најголемиот производител на автомобили во светот.

Иако одредени модели, како миниванот „гранвија“ (Granvia), станаа популарни во Кина, продажбата на „Тојота“ во таа земја опадна за 13,5 проценти, на 152.065 автомобили во август. Дополнително, ценовната војна со компании како БЈД (BYD Co), која е во тек, ја загрозува нејзината понатамошна пазарна позиција.

Падот на побарувачката за електрични возила ги натера некои од најголемите светски производители на автомобили да ги намалат целите за електрификација. Минатиот месец извештајот на „Никеј“ (Nikkei) покажа дека „Тојота“ го намалила својот годишен план за продажба за 2026 година од 1,5 милион електрични автомобили на еден милион.

Во август „Тојота“ продаде 12.682 електрични возила, од кои само 119 беа продадени во Јапонија. Во меѓувреме, во истиот месец, продала 336.848 хибриди, што е зголемување од 22 процента во споредба со минатата година.

Прифаќањето на електричните возила во оваа островска земја е побавно отколку на другите големи пазари поради доминацијата на хибридите и бензинските автомобили.

На почетокот на неделава „Тојота“ го зголеми износот на откупот на акции на 1,2 трилион јени (8,3 милијарди долари), додавајќи 200 милијарди јени на планот за откуп на акции што беше најавен во мај.

Оперативната добивка на компанијата за кварталот што заврши во јуни изнесуваше 1,31 трилион јени, што е 17 проценти повеќе од претходната година. Нејзините хибридни модели добро се продаваат во Северна Америка, а слабоста на јенот помага да се зголемат приходите од странство.