„Алкалоид“ отвори компанија во Казахстан, планиран пробив во Азија

„Алкалоид“ АД Скопје регистрираше ново капитално поврзано друштво во Казахстан, со назив „Алкалоид Казахстан“ ДОО, што е прва подружница на компанијата во Азија, соопштија од компанијата. Друштвото е во 100 процетна сопственост на „Алкалоид“АД Скопје.

„Отворањето на ова друштво претставува исклучителна можност за искористување на големиот потенцијал за пласирање фармацевтски производи на овој пазар, чија вредност на годишно ниво изнесува над 2 милијарди евра“, наведуваат од компанијата.

Оттаму додаваат дека Казахстан е пазар со 19,6 милиони жители и има економија со најдобри перформанси во Централна Азија.

„Портфолиото на ‚Алкалоид‘ во Казахстан за почеток ќе опфаќа антибиотици и додатоци во исхраната наменети за бремени жени. Во иднина компанијата планира проширување на асортиманот и присуство и во други земји од тој регион на интерес“, соопшти компанијата.

Подружницата во Казахстан, лоцирана во градот Алмати, е 26-то капитално поврзано друштво на „Алкалоид“ по ред.

„Проширувањето кон азискиот континент е во насока на главните стратешки определби на компанијата, како и нагласената извозна ориентација и глобализација на брендот ‚Алкалоид‘“, велат од компанијата.

Во моментов нема коментари за веста. Биди прв да коментира...

Остави коментар