„Алкалоид“ го патентира првиот „омепразол“ во течна форма во светот

Македонската компанија „Алкалоид“ разви течна форма на лекот „омепразол“, готов за употреба, за првпат во светот. Од компанијата денеска соопштија дека иновативноста на овој нов производ се базира на два посебни раствора содржани во двокоморското пакување, кое при отворањето автоматски ги меша двата раствора и така се добива готовиот течен „омперазол“ за употреба.

За производството на лекот, компанијата инвестирала во наменски изработена машина соодветна за овој иновативен производ, осигурувајќи ефикасен и одржлив синџир на негова испорака низ светот, а за тоа ги известила и инвеститорите на Македонската берза.

За пероралниот раствор „омепразол“, „Алкалоид“ го доби првиот интернационален патент за лек со додадена вредност (Value Added Medicine – VAM), а првите одобренија за ставање во промет на овој иновативен лек веќе се доделени за македонскиот пазар и за пазарот во Обединетото Кралство. Во тек се регистрациските постапки за земјите во Европа и за пазарите на Европската Унија, при што се очекува добивање одобренија за ставање на лекот во промет и негово последователно лансирање, се наведува во објавата на компанијата.

Оттаму велат дека во моментот во развојните лаборатории на компанијата се работи на уште неколку иновативни формулации. 

Инаку, овој лек е првиот патентиран лек со додадена вредност на „Алкалоид“, наменет, пред сѐ, за третман на рефлуксен езофагитис и на гастроезофагеална рефлуксна болест (ГЕРБ) кај мали деца што не можат да голтаат таблети, како и кај возрасни пациенти што имаат тешкотии со голтањето (пациенти со дисфагија) и неможност за голтање (пациенти со поставени сонди за гастрично хранење и/или геријатриски пациенти).