„Реплек АД“ забележа раст на приходите од продажба за 30,9 отсто во третиот квартал од годината споредено со истиот период лани. Компанијата објави дека растот е остварен во сегментот фармација, а позитивниот резултат кој е „продолжение на трендот од изминатите две тримесечја, придонесе за зголемување на вкупните приходи од продажба остварени за девет месеци од 2024 година, кои во споредба со истиот период од 2023 година се зголемени за 24,3 отсто, надминувајќи 21 милиони евра“.
Растот на приходите од продажба се должи на зголемените продажби на домашниот пазар за 68 отсто, но и од натамошното зголемување на продажбата на странските пазари каде се остварени приходи кои се за 20,7 отсто повисоки од лани.
Кумулативно, за изминатите девет месеци од оваа година, „Реплек АД“ оствари продажба на домашниот пазар во вредност од близу 5,3 милиони евра, што е за 54,8 отсто повеќе од лани, како и продажба на странските пазари во вредност од над 16 милиони евра, што е за 17 отсто повисоко од остварувањето во истиот период минатата година.
„Задоволни сме од остварените резултати во овој период на годината, кои ги надминаа и нашите првични очекувања предвидени со годишниот план за продажба. Ваквиот позитивен тренд е резултат на големата посветеност и енергија што ја вложува целокупниот тим на Реплек во реализација на нашата компаниска развојна стратегија која се темели на инвестиции и модернизација, градење на силно портфолио на производи и јакнење на пазарните позиции, како и унапредување на задоволството на вработените. Уверен сум дека позитивните резултати кои ги бележиме во континуитет во изминатиот период ќе ни влеат дополнителна енергија и мотив за реализација на нашата визија за развој на Реплек како современа, динамична компанија која со своите континуирани успеси и понатаму ќе дава значителни придонес за развојот на македонската економија, истовремено креирајќи дополнителна вредност за вработените, акционерите и за сите наши партнери“, изјави Душан Пецовски, главен и извршен директор на „Реплек АД“.
Растот на приходите од продажба во деветте месеци од оваа година ја прави повеќе од извесна реализацијата на предвидувањата за очекуваните годишни приходи од продажба, кои според финансискиот план за 2024-та се очекува да достигнат околу 31 милион евра, што е за околу 23 отсто повеќе во однос на претходната година, велат од компанијата.
.webp){kind=icon}
