„Алкалоид“ основа енергетска фирма: Ќе произведува струја во Гевгелија

„Алкалоид“ АД Скопје регистрираше ново капитално поврзано друштво со назив „Алкалоид енергетика“ ДООЕЛ Скопје, со цел производство на електрична енергија, соопшти компанијата преку Македонската берза. Друштвото е во 100 проценти сопственост на „Алкалоид“. 

„Имајќи ги предвид заложбите на ‚Алкалоид‘ АД Скопје за намалување на јаглеродниот отпечаток во рамките на својата ЕСГ-стратегија и напорите за одржлив развој, овој потег е од исклучителна важност во нивното остварување“, велат од компанијата.

Оттаму информираат дека проектот предвидува изградба на фотоволтаична централа лоцирана во Гевгелија, со капацитет за производство на електрична енергија од околу 11.000 мегават-часови на годишно ниво.

„Со овие капацитети ќе се овозможи од 75 до 85 проценти од електричната енергија која се користи за производствените капацитети на ‚Алкалоид‘ АД Скопје да биде од сопствени обновливи извори“, наведуваат од компанијата.

Како општествено одговорна компанија која се грижи за животната средина и за здравјето на граѓаните, „Алкалоид“АД Скопје придонесува за намалување на загадувањето и за исполнување на строгите еколошки стандарди во целост, додаваат од компанијата. 

„Инвестирањето во нови производствени капацитети, современа опрема, во изработка на квалитетни проекти, грижа за животната средина и во енергетска ефикасност останува примарна стратешка определба на ‚Алкалоид‘ АД Скопје и во периодот што следува“, информираат од компанијата.