Значителен раст на добивката на „Алкалоид“ и 222 нови вработувања

Во периодот јануари-септември годинава „Алкалоид“ АД Скопје оствари единечна нето-добивка од 1,4 милијарди денари (23,3 милиони евра), што е зголемување за 10 проценти во однос на истиот период минатата година. Остварената консолидирана нето-добивка во овој период изнесува 1,3 милијарди денари (22,4 милиони евра) и во споредба до добивката од периодот јануари-септември 2023 година бележи зголемување за седум проценти.

Од компанијата информираат дека странските пазари заземаат 68 проценти од вкупните консолидирани продажби во вовој период.

„Најголем пораст кај извозните пазари бележат продажбите остварени во земјите од Источна Европа (раст од 20 процент) и во земјите од Западна Европа (раст од 11 проценти)“, наведуваат од „Алкалоид“.

Во периодот јануари-септември 2024 година во „Алкалоид“ има 222 нови вработувања. Со нив, групацијата „Алкалоид“ брои 3.023 вработени, од кои 2.298 се во земјава, а 725 се вработени во капитално поврзаните друштва во странство.  

Во однос на плановите за идниот период, од компанијата очекуваат трендот на работење во отежнати економски услови, кои беа актуелни во изминатите неколку години да продолжи и во 2024 година.

„Доминанти предизвици беа инфлацијата и порастот на каматните стапки, кои, сепак, според сите очекувања, би требало да влезат во зоната на стагнација, а можеби и на благо опаѓање. Секако, глобалните безбедносни кризи ги отежнуваат економскиот амбиент и предвидливоста, што секогаш може да повлијае и врз цените на енергентите, да создаде тешкотии во синџирите на испораки, но и да повлијае врз достапноста на одредени материјали“, наведуваат од компанијата.

Оттаму очекуваат во 2024 година да продолжат по патеката на континуираниот раст базиран на можностите од тековните инвестиции во нови производствени капацитети и опрема и од вложувањата во развојноистражувачки проекти, на тој начин создавајќи конкурентно портфолио и можности за ширење на пазарите.

„За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнување и во усовршување на нивото на знаења и на вештини на нашите вработени и во градење таленти“, велат од компнаијата.

Во согласност со досегашните резултати, при непроменети услови на пазарите во кои функционира „Алкалоид“, менаџментот на компанијата проценува надминување на планираните консолидирани продажби за 2024 година и за првпат реализирање износ од над 18,5 милијарди денари (300 милиони евра).

Во моментов нема коментари за веста. Биди прв да коментира...

Остави коментар