„Витаминка“ со оптимизам влезе во 2025 - се очекува раст на продажбите за 30 отсто

Во текот на 2025 година прехранбената компанија „Витаминка“ од Прилеп очекува забрзан раст на приходите од продажба во однос на претходните две години.

Во бизнис планот на компанијата објавен на Македонската берза се наведува дека за оваа година се планирани приходи од продажба во висина од 80 милиони евра, што претставува раст од 30 отсто во однос на очекуваните за 2024 година.

Очекувањата на менаџментот се дека лани биле остварени приходи од продажба во висина од над 60 милиони евра.

Според бизнис планот, 47 милиони евра се очекува да бидат продажби оставени на домашен пазар, а 33 милиони евра од извоз.

Очекувања за растот на приходите од продажба се темелат на инвестициите кои беа реализирани во претходниот период.

„Во текот на месец мај 2024 година започна со работа новата инвестиција во опрема од две автоматски линии за пакување на флипс, започната во 2023 година, што ќе придонесе да се зголеми продуктивноста. Вредноста на инвестицијата е 650.000 евра. Постојано работиме и на други развојни зафати, доминантно во делот на пуштањето нови производи на постоечките машини (линии), а со цел „Витаминка“ да го засили присуството на пазарите со нови производи, остварувајќи го планското производство, особено во делот на чоколадната програма и новата линија за мафини и тортички“, се наведува во бизнис планот.

Компанијата успеа да оствари и значителни заштеди на струја по инвестициите во фотоволтаици.

„Заштитата на животната средина е еден од нашите врвни приоритети и затоа рационално ја користиме енергијата и го зголемуваме фокусот на обновливите извори на енергија, користиме најквалитетни суровини и обезбедуваме внимателно управување со отпадот. Започнавме силен инвестициски циклус со цел да го зголемиме уделот на обновливите извори на електрична и топлинска енергија и да ја зголемиме енергетската ефикасност на нашата опрема и процеси“, стои во бизнис планот.

„Витаминка“ вработува околу 700 лица во Прилеп, Скопје и Штип, а во текот на оваа година се очекува бројот на вработени да се зголеми.