„Е и ППФ телеком“ ја купи СББ за 825 милиони евра

„Е и ППФ телеком“ (E& PPF Telecom) се согласи да ја купи „Србија броадбенд“ - СББ (Serbia Broadband - SBB) за 825 милиони евра (855 милиони американски долари), без готовина и без долгови.

Според договорот објавен денеска, „’Е и ППФ телеком’ целосно ќе ги преземе операциите и базата на корисници на СББ, а потоа ќе ги одвои директните сателитски операции на СББ, кои ќе му се продадат на ’Телеком Србија’“, се наведува во соопштението на компанијата.

„Јунајтед груп“ (United Group) ќе ги задржи своите медиуми, кои ќе продолжат да се емитуваат преку СББ, се додава во соопштението. Со одобрување од регулаторот, продажбата треба да заврши во првата половина од годината.

„Купувањето ќе создаде широка синергија, ќе ги зголеми приходите, ќе ги намали трошоците и ќе ја поддржи стратегијата на ’Телеком Србија’ да стане водечка телекомуникациска компанија на Западен Балкан“, се истакнува во одвоено соопштение од белградската компанија.

Државниот оператор за фиксна и мобилна телефонија, кој е и кабелски провајдер, купи и дел од имотот на „Јунајтед груп“ на Балканот.

„Телеком Србија“ се согласи да плати 652 милиони евра, исто така без готовина и без долгови, за да ја преземе „Еон ТВ интернешнел“ (Eon TV International Ltd) од холдингот „Нет ТВ“ (NetTV), кој се занимава со директно сателитско емитување и е дел од „Еон сат“ (EoNSat) и „Тотал ТВ“ (Total TV) во Србија и во Македонија.

Како дел од тој договор, „Телеком Србија“ изјави дека  од „Јунајтед груп“ стекнува „одредени права, лиценци и други средства поврзани со каналите на ’Спорт клуб’ (Sport Klub) во Западен Балкан“.