Унгарската компанија што има намера да влезе на македонскиот телекомуникациски пазар годинава ќе го пушти првиот унгарски сателит во орбитата. Групацијата 4иГ, заедно со „Антена Унгарија“ и „Њу спејс индустрис“, ја регистрира компанијата „Карпатија Сат“, која ќе го лансира сателитот што е погоден за емитување, интернет и телефонски услуги, пренос на податоци…
Мнозински удел од 51 отсто во „Карпатија Сат“ ќе има групацијата 4иГ, „Антена Унгарија“ ќе поседува 44 отсто, а „Њу спејс индустрис“ 5 отсто од капиталот.
При објавата на намерата за лансирање на првиот унгарски сателит, претседателот на групацијата 4иГ, Гелерт Жазсаи, изјави дека оваа година е пресвртница во 25-годишната историја на компанијата, а вложувањето во сателитот е пионерски потег што ќе обезбеди дополнителни можности за развој.
Минатата недела Жазсаи на средба со македонскиот министер за транспорт и врски Александар Николоски истакна дека компанијата има волја да придонесе и за развојот на телекомуникацискиот пазар во земјава.
Македонија е дел од планот за ширење во Западен Балкан
На вчерашната седница на Владата, министерот Николоски информирал дека писмото со намери од групацијата 4иГ е веќе пристигнато.
„Групацијата е вториот по големина телекомуникациски оператор во Унгарија и водечки ИТ систем-интегратор, со растечко инвестициско портфолио во секторот на вселенска и одбранбена индустрија. Групацијата 4иГ изрази интерес за анализа на условите за влез на телекомуникациски пазар во Македонија и нудење услуги во мобилната и фиксната телефонија. Иницијативата е усогласена со стратегијата на групацијата за проширување на своето присуство во земјите од Западен Балкан“, соопшти Владата на Македонија.
Унгарската компанија веќе е присутна на пазарите во Црна Гора и Албанија. Брендот „Оне“ е водечки на пазарот на 5Г мобилни услуги во Црна Гора, додека „Оне - Албанија“ формирана преку консолидирање на албанските телекомуникациски компании станува врвен телекомуникациски провајдер во земјата.
„Покрај тековните инвестиции, групацијата 4иГ во соработка со ’Телеком Египет’ планира и инсталација на подводен кабел за пренос на податоци со висок капацитет за поврзување на Египет и Албанија. Овој проект може да донесе дополнителни придобивки за Македонија преку зајакнување на дигиталниот и економски раст на земјата“, наведуваат од Министерството за транспорт.
Има ли простор за нов оператор на македонскиот пазар?
Доколку Унгарците одлучат да влезат на пазарот во земјава, ќе бидат седми мобилен и шести оператор во фиксната телефонија.
Заклучно со крајот на минатата година, според извештаите на Агенцијата за електронски комуникации, во земјава имало 1.920.403 претплатници во мобилната телефонија. Во овој сегмент најголем удел на пазарот има „А1 Македонија“.
Заклучно со декември лани, пак, активни биле 441.204 фиксни линии, а во овој дел најголем пазарен удел има „Македонски телеком“.
.webp){kind=icon}
