„Макстил“ веднаш ги бара назад парите од солидарниот данок

„Макстил“ веднаш ќе си ги бара назад парите што ги плати по основ на солидарен данок. Компанијата во 2023 година плати 4,3 милиони евра за таа намена, што беше најголем износ.

Компанијата ќе бара поврат на средствата откако Уставниот суд минатата недела го укина законското решение со кое компаниите што имаа приходи од над 10 милиони евра во време на енергетската криза во 2022 година беа обврзани со вонредната давачка. Целта беше да се соберат средства за ублажување на последиците од кризата и да се придонесе за јавните расходи на солидарен начин.

„Бевме една од најзасегнатите компании со Законот за солидарен данок и нормално е веднаш да си ги бараме парите што неправедно ги плативме, зашто ни се потребни за предвидливост и буџетирање, иако имаме рок од пет години за да го направиме тоа. Знаеме дека државниот буџет е таков каков што е и дека Владата има планирано трошоци. Подготвени сме на некој начин да разговараме за да се договориме за динамиката за враќање на парите. Не помина многу време откако ги уплативме парите и мислам дека нема да бараме камати, бидејќи не сакаме дополнително да го оптоваруваме буџетот“, изјави Димитар Цветковски од „Макстил“.

Уставниот суд постапуваше по барање на стопанските комори и неколку компании во земјава и при носењето на одлуката се посомнева дека станува збор за закон што произведува повратно дејство, што е во спротивност со членот 52 од Уставот.

„Судот го имаше предвид фактот дека ретроактивноста и нејзиниот исклучок се дозволени само кога станува збор за тековни постапки, но во случајот засегнатите субјекти ги окончале односите со плаќањето данок во 2022 година. Судот во оваа фаза оценува дека со донесувањето таков вид данок компаниите се ставени во нееднаква положба и дека законодавецот направил упад во уставно загарантираното право на сопственост, како и упад во слободата на пазарот и претприемаштвото“, констатира Уставниот суд.

Премиерот Христијан Мицкоски изјави дека одлуките на Уставниот суд не се коментираат, туку се спроведуваат и ако судот донесе одлука да се вратат 50-те милиони евра од солидарниот данок, тие ќе бидат вратени.

Во моментов нема коментари за веста. Биди прв да коментира...

Остави коментар