САП е највредната европска компанија, го симна „Ново Норидск“ од првото место

Технолошкиот гигант САП (SAP) денес стана највредната компанија во Европа. Германската компанија ја помести данската фармацевтска компанија „Ново Нордиск“ од првото место. По денешниот раст на акциите на САП, вредноста на компанијата достигна 311 милијарди евра. Акцијата порасна нешто под еден процент. Од друга страна, акциите на „Ново Нордиск“ паднаа за повеќе од два отсто, со што пазарната капитализација на данската компанија достигна 309 милијарди евра. Заслугите не се само за САП.

Акциите на „Ново Нордиск“ изгубија приближно половина од вредноста во последните шест месеци. Акциите на САП се зголемија за 40 отсто минатата година. САП ги жнее придобивките од промената во стратегијата. Компанијата се префрли од продажба на софтверски лиценци кон изнајмување облак услуги. Тие, исто така, гледаат зголемена побарувачка за софтвер за вештачка интелигенција.

Добар дел од растот на цената на акциите на „Ново Нордиск“ поттикнат од успехот на нејзините лекови за слабеење веќе е избришан. Се повеќе и повеќе конкуренти бараат да профитираат од порастот на инјекциите за слабеење. Во исто време, резултатите од некои од истражувањата на „Ново Норидск“ не ги исполнија многу високите очекувања за губење на тежината.

САП минатата година го замени холандскиот производител на полуспроводничка опрема АСМЛ (ASML) како највредната технолошка компанија во Европа. „Ново Нордиск“ во последните две години се бори со француската луксузна групација ЛВМХ (LVMH) за позицијата најголема во Европа. Акциите на САП исто така растат поради зголемените инвестиции во германски акции, објави „Блумберг“.

САП претставува поголем дел од германскиот индекс од најпознатиот автомобилски сектор во земјата, кој ги вклучува „Фолксваген“ и „Мерцедес Бенз“. Уделот на САП во германскиот индекс Dax постојано ја надминуваше границата од 15 отсто, принудувајќи ја германската берза да воведе нова, неограничена верзија на индексот минатиот месец.

Аналитичарите очекуваат приходите од облак услугите на САП да пораснат за 29 отсто оваа година, додека вкупните приходи се очекува да пораснат за 13 отсто на 38,5 милијарди евра. Доколку успеат, тоа би било највисоката годишна стапка на раст во последните десет години. Понатамошно зголемување на оперативната добивка се очекува поради преструктуирањето објавено во јануари 2024 година.

Компанијата е исто така изолирана од европските економски проблеми поради нејзиното големо присуство во САД, нејзиниот најголем пазар. САП генерираше 2,9 милијарди евра од продажба во САД во четвртиот квартал, околу 31 отсто од вкупниот приход, објави „Блумберг“. Аналитичарите, исто така, го истакнаа потенцијалот на новиот производ лансиран од САП минатиот месец, кој им овозможува на корисниците да ги поврзат своите податоци со податоци од трети страни и да ги анализираат преку асистенти со вештачка интелигенција, пишува „Фајненшл тајмс.