Возилата на „Гугл“ се враќаат на македонските улици, се ажурираат мапите

Автомобилите на „Гугл стрит вју“ (Google Street View) оваа пролет се враќаат во Македонија. Во наредниот период ќе се движат по јавните патишта низ државата, вклучувајќи ги, но не ограничувајќи се на, Скопје, Куманово, Битола, Прилеп, Тетово, Штип, Велес, Охрид и Струмица. Целта на ова возење е да се ажурираат фотографиите на „Гугл стрит вју“ од градовите, патиштата и автопатиштата во Северна Македонија на „Гул мапс“.

Благодарение на „Гугл стрит вју“, корисниците веќе можат да истражуваат некои од најзначајните знаменитости во Северна Македонија

„Бидејќи инфраструктурата во градовите и меѓу нив се развива со текот на времето, неопходно е редовно ажурирање. Новите фотографии ќе им помогнат на корисниците да се движат поефикасно и да ги планираат своите патувања со поголема леснотија. „Гугл стрит вју“ нуди поглед од 360 степени на улиците, како и културни и природни знаменитости“, се наведува во соопштението.

„Гугл“ е силно посветен на заштита на приватноста. Пред да се објават собраните фотографии, тие се обработуваат со технологија која ги замаглува лицата на луѓето и регистарските таблички на возилата за да се осигури дека тие не можат да се идентификуваат, со што се заштитува приватноста.

Дополнително, „Гугл стрит вју“ обезбедува додатна функција за замаглување на сликите (поединци, автомобили, куќи итн.), што може да се побара со кликнување на копчето „Пријави проблем“ во долниот десен агол на објавените слики на „Гугл мапс“.

„Гугл стрит вју“ е популарна функција на „Гугл мапс“, со над 220 милијарди слики на „Стрит вју“ од целиот свет, вклучувајќи ги Антарктикот и Арктикот. Достапна е на десктоп и мобилни уреди, како и на „Гугл ерт“ (Google Earth).