„Енвидија“ се приближува до пазарна вредност од 4 трилиони долари

Две години откако „Енвидија“ (Nvidia Corp.) влезе во историјата како првиот производител на чипови што достигна пазарна капитализација од трилион долари, на дофат е еден уште повпечатлив момент: да стане првата компанија што ќе достигне 4 трилиони долари.

По појавата на кинескиот Дипсик (DeepSeek), кој предизвика пад на акциите претходно годинава и стравувања дека инвестициите во инфраструктура за вештачка интелигенција ќе забават, акциите на „Енвидија“ повторно се искачија на рекордно ниво.

Нејзините најголеми клиенти продолжуваат да трошат со полна пареа, при што голем дел од тие средства оди токму во нејзините компјутерски системи. Скок од 64 отсто од априлската најниска точка ја зголеми пазарната вредност на „Енвидија“ на 3,78 трилиони долари, надминувајќи го „Мајкрософт“ (Microsoft Corp.) со 3,70 трилиони и повторно станувајќи највредната компанија во светот.

„Веруваме дека ’Енвидија’ е навистина уникатно позиционирана и дека ќе ја задржи својата позиција во следната деценија и понатаму“, изјави Азиз Хамзаогулари, главен инвестициски директор во ЛСК (Loomis, Sayles & Co.) и основач на тимот за стратегии за раст на капитал.

Хамзаогулари не е единствениот. Неделава, аналитичарот на ЛК (Loop Capital), Ананда Баруа, ја зголеми целната цена на акцијата на „Енвидија“ од 175 на 250 долари, што би значело пазарна вредност од околу 6 трилиони долари. Баруа, кој има препорака за купување, очекува годишните трошоци за вештачка интелигенција од различни типови клиенти да достигнат речиси 2 трилиони долари до 2028 година.

„Иако можеби звучи фантастично дека основите на ’Енвидија’ може и понатаму да се засилуваат, потсетуваме дека ’Енвидија’ е суштински монопол за клучна технологија и дека има моќ за одредување на цените и маржите“, напиша Баруа во истражувачка белешка на 25 јуни.

Позитивното расположение околу „Енвидија“ и другите производители на опрема за вештачка интелигенција е остар пресврт во однос на почетокот на годината, кога појавата на напредни четботови како Дипсик, развиени релативно евтино во Кина, предизвика стравувања дека клиентите на „Енвидија“ ќе ги намалат трошоците. Наместо тоа, американските технолошки гиганти вложуваат уште повеќе во компјутерска инфраструктура.

„Мајкрософт“, „Мета“, „Амазон“ и „Алфабет“ се очекува да инвестираат околу 350 милијарди долари во капитални трошоци во нивните следни фискални години, во споредба со 310 милијарди годинава, според просекот на процени од аналитичари собрани од „Блумберг“. Овие компании сочинуваат повеќе од 40 отсто од приходите на „Енвидија“.

Секако, сè уште постојат голем број ризици што можат да го нарушат растот на „Енвидија“. Компанијата се потпира на ТСМ (Taiwan Semiconductor Manufacturing Co.) за производство на своите чипови, што ја изложува на трговските политики на американскиот претседател Доналд Трамп, кои можат да се променат во секој момент. Паузата од 90 дена на најстрогите царини истекува на 9 јули.

Истовремено нема гаранција дека најголемите клиенти на „Енвидија“ нема да го променат својот став за трошење во наредните години. Многумина од нив развиваат сопствени чипови за да ги избегнат високите цени што ги наплатува „Енвидија“.

„Вреднувањето зависи од упорноста на растот, а веќе знаеме дека најголемите клиенти на ’Енвидија’ се обидуваат да најдат начини да бидат поефикасни со своето трошење – не само со ’Енвидија’ туку и со префрлање на сопствени решенија“, рече Дан Давидовиц, главен инвестициски директор во ПКМ (Polen Capital Management). „Потребни се многу цврсти претпоставки за да се оправда ова вреднување, а ние сè уште немаме доволно јасна слика за идната побарувачка“.

Акциите на „Енвидија“ се тргуваат по цена што е 32 пати повисока од очекуваната заработка за следните 12 месеци, во споредба со 22 пати за индексот S&P 500.

Но тоа не го загрижува Хамзаогулари од ЛС, кој останува цврсто уверен дека вештачката интелигенција ќе го трансформира општеството и е верува дека „Енвидија“ ќе остане клучен добитник додека продуктивноста од оваа технологија расте.

„Тоа не значи дека сè ќе биде стабилно и без прекини, дека нема да има нарушувања во трошењето, но ова е секуларна структурна промена, а ’Енвидија’ останува еден од најголемите добитници“, рече Хамзаогулари. „Акцијата сè уште изгледа привлечно во тој контекст“.

Во моментов нема коментари за веста. Биди прв да коментира...

Остави коментар