„Тесла“ (Tesla) ги разочара инвеститорите со вчерашните квартални резултати (период април–јуни), што се одрази на вредноста на акцијата – по завршувањето на тргувањето, нејзината цена се намали за речиси 5,5 проценти.
Објавените резултати покажуваат дека приходите изнесувале 22,5 милијарди долари, што претставува намалување од 12 проценти во споредба со истиот квартал минатата година. Според „Блумберг“, ова е најголем пад во последната деценија.
Приспособената добивка изнесувала 40 центи по акција, што е помалку од веќе намалените очекувања на Волстрит – се очекуваа 42 цента.
Испораките на возила опаднале – произведени се речиси 397.000 возила, а продадени нешто повеќе од 384.000, што е за 1,61 процент помалку од очекувањата. Просечната продажна цена на возилата исто така се намалила, пренесе „Блумберг“.
„Тесла“ исто така објави пад на продажбата во секторот за производство и складирање енергија. Компанијата наведува дека трошоците поради царините се зголемиле за околу 300 милиони долари, а влијанието на овие давачки – според компанијата – ќе продолжи да расте во наредните квартали.
Позитивно изненадување е бруто-маржата, која е четири проценти над очекувањата.
Што ја очекува „Тесла“ во иднина?
Подоцна годинава државата ќе ја укине субвенцијата од 7.500 долари за електрични возила. Како ќе се одрази тоа на продажбата на „Тесла“?
Илон Маск изјави дека е можно да следуваат уште неколку тешки квартали.
„Не велам дека сигурно ќе ги има, но би можело – знаете, четвртиот квартал, првиот, можеби и вториот – но кога ќе постигнеме автономија во поголем обем во втората половина од следната година, сигурно до крајот на следната година, мислам дека би бил изненаден ако сликата на ’Тесла’ не биде многу уверлива“.
.webp){kind=icon}
