На берзанска аукција продадени акции од ВВ „Тиквеш“ за 1,8 милиони евра

На јавна берзанска аукција на акции на големи пакети на акции денеска на Македонската берза се продадоа 10.646 обични акции издадени од винарската визба „Тиквеш“ АД Кавадарци. Станува збор за пакет акции што претставува 3,94 проценти од основната главнина на друштвото. Акциите се продадоа по почетната продажна цена од 10.596 денари по акција односно сумата за целиот пакет акции изнесуваше 112,8 милиони денари (1,8 милиони евра).

„Блумберг Адрија“ објави дека во пресрет на аукцијата имаше тргување со два блока акции на компанијата.  Вчера во блок-трансакција вредна 47,4 милиони денари (771.000 евра) се продадоа 6.500 акции од винарската визба, коишто претставуваат 2,40 проценти од основната главина на друштвото. Акциите се продадоа по цена од 7.300 денари за акција.  Денеска во блок-трансакција вредна 5,1 милиони денари (82.000 евра) се продадоа 510 акции коишто претставуваат 0,19 проценти од основната главнина на друштвото. Акциите се продадоа по цена од 10.000 денари по акција.

Според податоците на Централниот депозитар за хартии од вредност, единствен голем акционер во ВВ „Тиквеш“ е трговското друштво за инжинеринг и услуги во прометот „М-6“ ДОО Скопје, кое поседува 80,08 проценти од вкупниот број акции. Станува збор за компанија зад која стои македонскиот бизнисмен Светозар Јаневски.

 

 

Во моментов нема коментари за веста. Биди прв да коментира...

Остави коментар