На берзанска аукција ќе се продава голем пакет акции од ВВ „Тиквеш“

На барање на членката „Еурохаус“ АД Скопје, по пат на јавна берзанска аукција на акции при продажба на големи пакети на акции ќе се понудат на продажба 10.646 обични акции издадени од винарската визба „Тиквеш“ АД Кавадарци, информира Македонската берза.

Станува збор за пакет акции што претставува 3,94 проценти од основната главнина на друштвото. Почетната продажна цена изнесува 10.596 денари по акција односно вкупната почетна сума за целиот пакет акции изнесува 112,8 милиони денари (1,8 милиони евра). Берзанската аукција ќе се одржи на 20.08.2025 година (среда), а акциите ќе се продаваат преку моделот „се или ништо“.

Според податоците на Централниот депозитар за хартии од вредност, единствен голем акционер во ВВ „Тиквеш“ е трговското друштво за инжинеринг и услуги во прометот „М-6“ ДОО Скопје, кое поседува 80,08 проценти од вкупниот број акции. Станува збор за компанија зад која стои македонскиот бизнисмен Светозар Јаневски.

ВВ „Тиквеш“ е еден од најголемите производители на вино во Македонија. Во визбата годишно се преработуваат 55 милиони грозје и се произведуваат околу 35 милиони литри вино. Асортиманот опфаќа 24 видови вино, вклучувајќи црвени и бели вина, квалитетно и специјално одбрани типови вина. Вината на „Тиквеш“ се присутни на пазарите во Србија, Црна Гора, Хрватска, Босна и Херцеговина, Албанија, Европската унија, Русија, Украина, САД, Канада и Австралија. Компанијата во последните три години бележи континуиран раст на добивката.