Македонската станушина меѓу најпопуларните вински сорти грозје во регионот

Дури 50 отсто од винското грозје се одгледува во винските региони на само четири земји - Франција, Италија, САД и Шпанија. Следува Балканот како петти најголем вински регион. Во светот постојат над 10.000 вински сорти грозје, но само десетина се користат за масовно производство и уживаат светска репутација. Една од најпопуларните сорти на црно грозје е каберне совињон поради својата темна богата арома и често се послужува со црвено месо. Мерло, пак, е идеален за љубителите на суви вина. Пино ноар има елегантна и овошна нота, а шардоне е совршен со риба или одбрани сирења поради кремастиот вкус.

И во регионот Адрија, кога е во прашање овој бизнис, препознатливоста на една земја се гради токму преку автохтоните локални сорти. Секој турист сака да проба нешто уникатно и карактеристично за поднебјето, па повеќе подзаборавени и неправедно маргинализирани локални сорти неочекувано се враќаат во живот.

Меѓу нив е и единствената македонска автохтона сорта на грозје, а дека станушината е повторно на цена ни потврди и Ивана Симјановска, интернационална судијка за мирни вина. Според неа, овој наш бренд конечно го зазема своето заслужено место, но и дополнува дека кај нас во фокусот останува вранецот, иако не е наша локална сорта.

Ивана Симјановска, интернационална судијка за мирни вина/Фото: Кристина Нановиќ

 

Симјановска за „Блумберг Адрија“ направи список со сорти на грозје што во моментов се најпопуларни во регинот Адрија. Освен прокупецот за кој вели дека влегува на голема врата на интернационалната винска сцена, таа од Србија издвојува уште две сорти-седуша и сила.

„Од Хрватска тоа се плавац мали, пошип, грк и мараштина. За Црна Гора најважна сорта останува вранецот која потекнува од оваа земја, а од Босна и Херцеговина ни доаѓа жилавката“, вели Симјановска.

Станува збор за претежно автохтони сорти на црвено и бело грозје за кои изминативе години значително расте интересот, а вината произведени од овие сорти бележат се’ поголем успех и на интернационалните вински натпревари каде што оценува и нашата соговорничка. За најактуелните од нив ви пренесуваме корисно инфо, но и ви откриваме со каква храна да ги спарите. 

Станушина

Сорта на грозје која се одгледува само во Македонија, главно во тиквешкиот регион. За неа експертите велат дека има уникатен генетски профил, отпорна е на суша, но и на болести што ја прави погодна за одгледување. Дава доста квалитетен принос без потреба од наводнување. Шеќерноста е на средно ниво со што е погодна за производство на вино со висок квалитет и средна јачина, а погодна е за производство на црвени и на розе вина. Се препорачува истите да се консумираат на температура од 10 до 16 степени и се одличен додаток за бели и жолти сирења, лесни и крем десерти, листови салати, ореви и слатки.

Ако сакаш да запознаеш еден народ, седни на неговата софра и напиј од неговото вино, вели една италијанска поговорка. Ние додадовме и храна/Извор: Depositphotos

Сила

Една од новосоздадените српски сорти на винско грозје со вкрстување на кевидинка и шардоне. Создадена е на реномираниот Институт во Сремски Карловци. Оваа сорта е официјално признаена како нова во 1988 година, а името го добила по иницијалите на првиот автор, д-р Симе Лазиќ, како знак на признание за неговиот придонес во нејзиното создавање. Една од клучните предности на оваа сорта е високата плодност на пупките и ластарите што резултира со високи приноси. Виното добиено од оваа сорта се сервира на температура од 10 до 12 и се консумира со ладни предјадења, светло месо и риба. 

Винови лози во Србија/Извор: Depositphotos

Плавац мали

Најзначајната автохтона сорта на грозје во Хрватска. Најмногу се одгледува долж брегот на Далмација и се одликува со арома на капини, цреши, пиперки и зачини. Гроздовите се густи, но приносот не е голем, па вината направени од оваа сорта се исклучително концентрирани и препознатливи по нивната интензивно темна рубин боја. Овие вина одлично одат со различни специјалитети од месо и со полути јадења од риба.

Винови лози во недоглед во Хрватска/Извор: Depositphotos

Грк

Уште една автохтона сорта, овојпат на бело грозје, која вирее на песочна почва во селото Лумбарда на островот Корчула. Виното од оваа сорта е суво, со богат и заоблен вкус кој се карактеризира со блага горчина на крајот. Не е лесен за одгледување бидејќи има исклучиво женски цветови кои кај опрашувањето зависат од соседните сорти, па затоа најчесто се сади во пар со сортите плавац мали или рукатац. Виното од оваа уникатна сорта се сервира разладено на околу 12 степени како аперитив пред оброк. Неговата свежина оди одлично со морска храна, салати, ладни јадења и со свинско филе.

Лумбарда на островот Корчула во Хрватска е иделано место за одгледување на грозје од сортата грк/Извор: Depositphotos

Жилавка

Бела сорта грозје која најмногу се одгледува во пределите околу Мостар во Босна и Херцеговина, но ја има и кај нас. Вината добиени од оваа сорта грозје се со жолтеникаво-зелена боја и се познати по својата арома на крем од ореви и цитрус. Истите се служат на температура од 10 до 12 степени и се комбинираат со морска храна, тестенини, бело месо, сирење и со десерти.

Жилавката е најзастапена во околината на Мостар/Извор: Depositphotos

ОЦЕНУВАЊЕ НА ВИНО: ШТО Е НАЈВАЖНО?

Последниот вински натпревар на кој Симјановска делеше оценки е „Вајн Вижн бај Оупен Балкан“ (Wine Vision by Open Balkan) во Белград, а следниот на кој ќе суди е Мундус Вини (Mundus Vini) што ќе се одржи во Нојштад, Германија на крајот на февруари.

Објаснува дека најважни се три аспекти при оценувањето на едно вино-визуелниот дел, аромата и, се разбира, вкусот. Кога ќе се соберат оценките од секој од овие три аспекти се добива целокупната оценка, иако вели дека не е баш така едноставно како што звучи. Секогаш оценуваат на слепо, па како вински судии треба сами да ја погодат сортата и од кој регион доаѓа конкретното вино пред да го оценат. Од овие натпревари често со медали се враќаат и македонски винарии.

Винските судии понекогаш при оценувањето на слепо мора да погодат од кој регион доаѓа одредена сорта грозје/Извор: Depositphotos

„Вината добиени од вранец речиси секаде се во фокусот и радува тоа што моносортните вина од вранец, како и блендовите со вранец се едни од најнаградуваните наши вина“, открива Симјановска.

Во моментов нема коментари за веста. Биди прв да коментира...

Остави коментар