Зголемена продажбата на македонското вино надвор од границите

Министерот за земјоделство, шумарство и водостопанство Цветан Трипуновски на саемот „Винска визија на Отворен Балкан“ во Белград изјави дека целта на Владата е да го зголеми производството и извозот на вино, истакнувајќи дека винарството е стратешки важен сектор за економијата во државата.

„Продажбата на македонското вино надвор од границите на државата е зголемена, при што Македонија е на 22 место во светот по производство на вино и на 29-то место по извоз. Девизниот прилив од извоз на вино за 2023 година изнесуваше над 57 милиони евра, а македонските вина се продаваат во преку 40 држави, најмногу на Балканот“, рече Трипуновски.

Тој истакна дека оваа година на саемот се претставуваат 80 винарски визби, од кои 68 се мали семејни винарници, а 12 се дел од здружението „Вина од Македонија“ (Wines of Macedonia). Дополни дека Владата ќе работи посветено на секторот винарство, кој, како што рече, е втора најзначајна гранка во земјата.

„Винска визија на Отворен Балкан“ оваа година се одржува од 22 до 24 ноември на Белградскиот саем. На третиот меѓународен саем за вино, храна, ракија и туризам има 650 изложувачи од 38 земји.

Од Македонија учествуваат 80 винарници и дестилерии, 6 изложувачи на храна и ресторан со 3 готвачи. Еден од најатрактивните сегменти на саемот е доделувањето на „ Винскиот трофеј на Отворен Балкан“, што ќе се одржи денеска. Ќе бидат прогласени најдобрите вина на фестивалот, а жирито составено од 26 меѓународни вински експерти, меѓу кои и шестмина носители на титулата „Мастер на виното“, ќе оцени речиси 1.000 примероци вино.

Во моментов нема коментари за веста. Биди прв да коментира...

Остави коментар