Повеќе од 15.000 туристи го посетиле досега Музејот на виното во Демир Капија, кој по својата содржина е еден од ретките од ваков тип не само во Европа туку и во светот. Овој уникатен простор (комбинација од традиција, археологија и модерна презентација) минатата година доби финансиска поддршка и од македонското Mинистерство за култура како проект од национален интерес.
Во музејот може да се видат стари алати за производство на вино, антички аморфи, документи, фотографии и интерактивни експонати, а престижниот француски водич за патувања „Петит футе“ (Petit Futé) го нарече „мал храм на винска консумна култура“.
„Музејот стана основен двигател на развојот на туризмот во Демир Капија, мала, но богата со природни ресурси општина. Посетителите се особено воодушевени од ентериерот, за кој редовно добиваме високи оцени“, вели проект-менаџерот Звонимир Будимировиќ во разговор за „Блумберг Адрија“.
Објектот во моментов содржи три одделенија: археологија, винска галерија и галерија за изложби и презентации. Музејот располага со артефакти што го отсликуваат историското минато на Демир Капија од праисторијата до денес, поврзани со различни периоди на развојот на овој крај, кои зборуваат за богатата традиција на винската култура.
Музеј на виното - Демир Капија
„Располагаме со над 800 експонати, некои особено значајни, како праисториските урни, кои се единствени и многу ретки артефакти нотирани во 12 век пред новата ера. Уникатноста на музејот е во неговата содржина. За разлика од повеќето музеи за вино што се фокусирани на конкретен регион, ние се обидуваме да го прикажеме и историскиот, културниот и етнолошкиот контекст на виното. Во Европа се евидентирани само пет такви музеи, а во светот постојат 12 такви“, појаснува нашиот соговорник.
Со релативно скромна инвестиција, музејот е отворен на 7 ноември 2010 година, симболично на Денот на ослободувањето на Демир Капија. Просторот е обезбеден од општината, а основниот музејски фонд е донација на семејството Будимировиќ и вклучува дрвени буриња за вино, стаклени и керамички чаши, бокали и шишиња, садови за складирање, чување и консумирање вино и алатки за обработка на земјата како предмети од локално значење.
Музеј на виното - Демир Капија
Минатата година музејот откупи дополнителни етнолошки предмети од локално население, со цел да се збогати музејската винска галерија. Сега во музејот може да се видат и бакарна аранија за варење маџун, традиционални ножици за кроење винова лоза, како и горен дел од статичен казан за варење ракија изработен од печена глина, преку кој се одвива хемискиот процес на создавање лозова ракија, како еден од традиционално најпознатите жестоки пијалаци на овие простори.
„Станува збор за предмети што денес не се веќе во употреба и нивното место е заменето со многу помодерни, побрзи и пософистицирани алатки. Тие сега се потсетник на минатото, во смисла на една традиција проследена со ритуали и локална егзотика, неповторливо доживување на семејната лозаровинарска приказна, како трага на времето, не само во овој регион туку и секаде во Македонија каде што се одгледува виновата лоза“, образложи тогаш кустос-археологот Цветанка Тодоровска Митрева, членка на музејскиот персонал.
Музејот може да се посети секој работен ден, од 8 до 16 часот, но за групни посети и екскурзии со претходна најава вратите се отвораат и преку викенд, но и за празници. Цената на влезниците е симболична и чини 50 денари. Најголем интерес има токму сега во летниот период, кога освен домашни, редовно го посетуваат и туристи од Европа, најмногу од Шведска, Холандија, Германија и од Италија.
Музеј на виното - Демир Капија
„Постојано ја збогатуваме програмата во оваа уникатна културна институција, која ги обединува традицијата, културата и модерниот туризам. Се наоѓаме во историски значајна винска област и сме редок пример на целосно посветен вински музеј во поширокиот регион, кој привлекува сѐ повеќе странски гости. Музејот веќе е влезен и во туристички водичи на САД, Јапонија, Полска, Франција, Австрија, Унгарија и Србија“, истакнува Будимировиќ.
Странските туристи покажуваат сѐ поголем интерес и за логото на музејот, на кое е прикажан бронзениот масивен кратер, еден од најимпозантните експонати што беа пронајдени меѓу стотиците археолошки предмети од 6 до 4 век пред новата ера во некрополата Требениште кај Горенци, Охридско.
Музејот во својата развојна стратегија има испланирано уште три одделенија, со кои ќе се комплетира неговата внатрешна содржина, пишува на официјалната страница. Се планира отворање одделение за природни реткости со акцент на орнитологија, етнолошка поставка македонска соба и уредување подземен дел на музејот во салата за дегустација на вина што ќе бидат за потребите за промоција на македонските винарски визби.
Музеј на виното - Демир Капија
„Музејот на виното за кратко време од своето постоење оствари соработка со голем број институции, но примарниот простор во кој се артикулира оваа соработка се винарските визби. Всушност, Музејот на виното е маркетиншки простор за производителите на вино од Тиквешијата, бидејќи реално претставува финале во промоцијата на производството на вино“, вели Будимировиќ.
Следен значаен проект на кој со неговиот тим веќе работат е дигитализирање на програмата, која во иднина би вклучувала 3Д-презентации и виртуелни тури.
.webp){kind=icon}
