Виното како инвестиција - откријте ги петте во кои вреди да се инвестира токму сега

Винската индустрија се соочува со тешкотии во многу земји во светот. Побарувачката за вино се намалува веќе неколку години, се наведува во глобалниот вински извештај на „Статиста“. Глобалното затоплување е само еден од предизвиците. Тоа ги менува условите на одгледување грозје, што може да влијае на квалитетот и достапноста на виното, но и да ја зголеми цената на виното од ретки берби. Исто така се наведува дека помладите потрошувачи се помалку заинтересирани за алкохолни пијалаци од порано и, кога пијат, избираат повнимателно.

Но ова не е нужно лоша вест за секого. Поради гореспоменатите трендови, во извештајот се наведува дека иднината на винската индустрија е фокусирана на премиум производи, диверзификација на понудата, одржливи и вина со помала содржина на алкохол.

Пазарот на премиум вино претставува мал но значаен сегмент од глобалниот пазар на вино, во вредност од 450 милијарди долари, само околу 1-2 отсто од вкупната вредност. Врвните вина се дефинирани според следниве критериуми:

• Квалитет: Вината мора да бидат високооценети од реномирани критичари.

• Долговечност: Тие треба да бидат способни да стареат од 10 до 20 години или повеќе.

• Цена: Цената по шише обично надминува 50 долари, а многу колекционерски вина се значително поскапи.

Убавите вина сѐ повеќе се третираат како алтернативна инвестиција, со оглед на нивната способност да се зголемуваат во вредноста со текот на времето. Во текот на последните три децении инвестирањето во вина премина од интересно хоби во сериозна алтернативна класа на средства.

Некои етикети се многу барани поради нивната колекционерска вредност и се препродаваат на секундарните пазари, каде што побарувачката често ја надминува понудата, што дополнително ја зголемува нивната вредност.

Во академскиот труд насловен „Цената на виното“, објавен во Журналот за финансиска економија (Journal of Financial Economics) во 2015 година, се посочува дека врвните вина во периодот од 1900 до 2012 година оствариле реален просечен годишен принос од 4,1 отсто. Таа инвестиција во тој период ги надмина другите алтернативни опции, како што се уметничките дела и поштенските марки.

Историски гледано, врвните вина покажуваат минимална корелација со традиционалните финансиски инструменти, што ги прави ефективно средство за диверзификација на портфолиото. За време на економски кризи, кога резервите често губат вредност, врвните вина често покажуваат исклучителна издржливост, пишува порталот „Вајн инвестмент“.

Врвната познавачка на виното, репортерката на „Блумберг“ Елин Мекој го прашала тајванскиот милијардер, познатиот колекционер на уметност и вино, Пјер Чен во кои вина вреди да се инвестира сега.

Неговото колекционерско патување е навистина фасцинантно, преминувајќи од моќните „бордо“ и „напа каберне“ до посуптилни вина како во „бургундец“. Чен верува дека наоѓањето одлично вино во кое вреди да се инвестира секогаш започнува со храната. „Почнав со вина што се комбинираат со храната што ја сакам, со местата што ги посетувам и со културите со кои се поврзувам“, вели тој.

Потрагата по совршениот спој на храна е секогаш важна. „Би препорачал да започнете на ист начин: размислете за состојките и подготовките во кои уживате и побарајте вина што одговараат на вашиот животен стил. Тоа е многу лично патување. Не гледајте што собираат другите. Следете ги вашите интереси, следете го вашиот вкус и размислете за луѓето со кои сакате да споделувате вино“.

На прашањето за сличностите меѓу неговите две страсти, уметноста и виното, Чен вели: „Ако уметноста е за трансформирање на просторот и создавање чувство во него, виното е време. Виното еволуира преку храната и останува во меморијата, откривајќи ја својата приказна со секоја голтка“.

 Како да инвестирате како милијардер?

Тој истакнува дека младата „бургундец“ може да биде многу разновидна, па затоа одлично оди не само со традиционалните црвени меса туку и со смели јадења. За оние што бараат рафинирани парови, Чен ја посочува долината на Лоара како одлична дестинација, особено за остри бели вина како „совињон блан“, кои одлично се комбинираат со морска храна и со лесни свежи јадења.

„Никогаш не размислувам за потенцијалот за инвестирање. Јас сум повеќе посветен на уметноста на живеењето - убавината на споделувањето со пријателите. Секој што купува вино за да го чува, на некој начин „влегува во инвестиција“, а она што го носи инвестирањето е уживање во иднината, среќа во иднината“, објаснува милијардерот.

Претстојната празнична сезона обично ја зголемува побарувачката за шампањ и други убави вина. Колекцијата на Чен вклучува извонредни постари берби на „дом перињон“, „круг“, „салон“ и други престижни шампањи; како и ретка скапа „бургундец“, како што е кутија со вина „домаин де ла романе-конти“ (Domaine de la Romanée-Conti) од 1999 година (процена: од 64.300 до 96.500 долари); како и „амарон“ (Amarone).

И еве список од пет вина во кои вреди да се инвестира во моментов, без илјадници (долари) на коцка.

„Гратамако болгери супериор“ (Grattamacco Bolgheri Superiore-100 долари) од 2013 година

„Болгери“ во Тоскана е познат по своите тоскански мешавини на „каберне совињон“, „мерло“ и „санџовезе“. Овој мирислив импозантен пример од помалку познат, но историски органски имот е жив и моќен, со ноти на сладунец и билки. Може да се пие сега или во текот на следните 15 години.

„Клос апалта“ (Clos Apalta -170 долари) од 2020 година 

Свилено меко, со минерали слоеви, капини и сливи, ова богато привлечно чилеанско вино вклучува висок процент од автохтоната сорта на грозје во земјата, „карменере“. Зад овој бренд стои француското семејство Лапостол, поранешни сопственици на „Гранд марние“. Се чека од пет до десет години за да се пие.

„Шато палмер“ (Château Palmer -300 долари) од 2019 година

Во споредба со „бургундец“, „бордо“ е поволно, а во 2019 година третиот раст на „шато палмер“ го достигна нивото на врвните вина на неговиот прв сосед „шато марго“. Многу интензивно и комплексно, „палмер“ остава долготрајна завршница. Исто така е сертифицирано како биодинамично. Ова вино може да трае до 2060 година.

„Филипонат клос дес гоисес екстра брут“ (Philipponnat Clos des Goisses Extra Brut-280 долари) од 2015 година

Првиот шампањ со една лоза (1935) не е толку широко распространет како „дом перињон“, а треба да биде. Најновиот винтиџ е интензивен, минерален и свилен, со елегантен карактер и сериозен потенцијал за стареење. За уште една или две деценија, виното ќе покаже уште поголема сложеност, со ноти на печени јаболка, топли печива и кора од лимон.

„Хејтц целар марта'с винејард“ (Heitz Cellar Martha's Vineyard-350 долари) од 2018 година

Чен продаде легендарно вино „напа“ со мирис на еукалиптус, од бербата од 1985 година, на својата аукција во Њујорк. Најновото издание е богато и свилено, прво под новата сопственост на „ Лоренс фемили естејт“. Нема да бидете разочарани. Пијте го од 2027 до 2040 година.