„Интел“ бара инвестиција од „Епл“ за да го забрза своето враќање

Технолошкиот гигант „Интел“ (Intel Corp.) се обратил до „Епл“ (Apple Inc.) со цел да обезбеди инвестиција во компанијата за чипови, која моментално е во тешка состојба, наведуваат извори запознаени со ситуацијата. Ваквиот чекор е дел од напорите за зајакнување на бизнисот, кој делумно е во сопственост на Владата на САД.

Двете компании разговарале и за тоа како би можеле да соработуваат поблиску, додаваат истите извори, кои сакаат да останат анонимни бидејќи дискусиите се доверливи. Разговорите се во почетна фаза и можно е да не резултираат со договор.

Извршниот директор на „Интел“, Лип Бу-Тан/Фото: Аанабел Чин, Блумберг

Акциите на „Интел“ скокнаа за 6,4 отсто и достигнаа 31,22 долари на берзата во Њујорк, откако „Блумберг њуз“ објави дека се водат разговори. Акциите на „Епл“ паднаа за помалку од 1 отсто, на 252,31 долари.

Евентуален договор би следувал по инвестицијата од 5 милијарди долари минатата недела од „Енвидија“ (Nvidia Corp.), која планира да соработува со „Интел“ за развој на чипови за персонални компјутери и дата-центри. „Софтбанк груп“ (SoftBank Group Corp.), јапонскиот технолошки гигант што сака да се прошири понатаму во САД, минатиот месец најави инвестиција од 2 милијарди долари во „Интел“.

„Интел“, според истите извори, се обратил и до други компании за можни инвестиции и партнерства.

Договор со „Епл“, долгогодишен клиент на „Интел“ што во изминатите пет години се префрли на сопствени процесори, би претставувал дополнителна потврда за обидите на компанијата за враќање. Сепак, малку е веројатно дека „Епл“ повторно би преминал на процесорите на „Интел“ за своите уреди. Најсофистицираните чипови на производителот на ајфон (iPhone) сега ги изработува партнерската компанија „Тајван семикондактер мануфекчуринг“ (Taiwan Semiconductor Manufacturing Co.).

Претставник на „Интел“ одби да коментира, а истовремено и портпаролот на „Епл“ не одговори на барањето за коментар.

Главниот извршен директор на „Интел“, Лип-Бу Тан, се обидува да се врати со поддршка од федералната влада. Во август, со посредство на администрацијата на Трамп, САД купија околу 10 отсто удел во „Интел“. Владата го гледа производителот на чипови како клучен дел од плановите за заживување на домашното производство, што е приоритет за Белата куќа.

Дури и со финансиска поддршка, предизвиците за „Интел“ остануваат огромни. Компанијата со седиште во Санта Клара, Калифорнија, го загуби долготрајното технолошко водство и им препушти дел од пазарот на конкурентски компании како што е „Адвенст микродевајсис“ (Advanced Micro Devices Inc.). Дополнително, „Интел“ се мачи да го искористи бумот во продажбата на опрема за вештачка интелигенција, што е специјалност на „Енвидија“.

Иако некогаш беше доминантен производител на чипови, „Интел“ денес има само дел од продажбата и пазарната капитализација на „Енвидија“. Исто така, компанијата отпушти работници и ги одложи плановите за проширување на фабриките за да се справи со влошената финансиска состојба.

Извршниот директор на „Епл“, Тим Кук/Фото: Блумберг

Сепак, инвеститорите станаа пооптимистични за изгледите на „Интел“ откако Владата вложи средства во компанијата. Акцијата е зголемена за повеќе од 60 отсто од почетокот на август.

Под водство на поранешниот извршен директор Пет Гелсингер, „Интел“ се насочи кон тоа да стане фабрика за чипови, бизнис што произведува полупроводници за надворешни клиенти. Но компанијата се мачеше да обезбеди доволно нарачки за да ги поддржи своите планови за проширување на фабриките.

„Интел“ продолжи да ја следи оваа стратегија и под водство на Лип-Бу Тан, но со поголема претпазливост. Тој во јули изјави дека компанијата ќе воведе нова напредна производствена техника наречена 14А, само ако клиентите претходно дадат конкретни нарачки и гаранции за користење.

„Епл“ и „Интел“ имаат долга и напната историја. „Епл“ со години ги користеше процесорите на „Интел“ во своите компјутери „мек“ (Mac), но од 2020 година почна да се оддалечува од доставувачот, што беше дел од пошироките напори да користи повеќе сопствени компоненти. „Епл“ исто така го презеде поголемиот дел од бизнисот со модемски чипови на „Интел“ во 2019 година.

Во последно време „Епл“ настојува да покаже дека значително инвестира во САД – иако најголемиот дел од неговото производство сè уште се одвива во странство. На настан во Белата куќа во август, компанијата најави план да потроши 600 милијарди долари за домашни иницијативи во рок од четири години, што е зголемување во однос на претходното ветување од 500 милијарди долари. Централниот дел од проширувањето е инвестиција од 2,5 милијарди долари во „Корнинг“ (Corning Inc.), долгогодишен снабдувач на „Епл“ со стакло.

Главниот извршен директор на „Епл“, Тим Кук, изјави за новинарот Џим Крамер од Си-ен-би-си (CNBC) дека овие инвестиции ќе охрабрат и други компании да отворат или да го прошират производството во САД, создавајќи „домино-ефект“.

На прашањето за „Интел“, тој рече дека конкуренцијата би била добра за индустријата за фабрики за чипови. „Би сакале да го видиме враќањето на ‘Интел’“, нагласи Кук.