„Орстед“ собра 9,4 милијарди долари по ударот од САД врз офшор ветерната енергија

„Орстед“ (Orsted A/S) собра 60 милијарди дански круни (9,4 милијарди долари) преку понуда на права за купување акции, клучна за напорите на компанијата да се справи со падот што ја погоди индустријата за ветерна енергија.

Ова е најголемо собирање капитал за една европска енергетска компанија во повеќе од една деценија и ќе ѝ овозможи на данската фирма, која има државна поддршка, да го зајакне својот биланс на состојба по потезите на администрацијата на Трамп против офшор ветерната енергија, кои го нарушија деловниот модел на „Орстед“.

Инвеститорите презедоа 99,3 отсто од повеќе од 900 милиони акции понудени во целосно осигурената зделка за зголемување на капиталот, соопшти компанијата во понеделникот вечер, додавајќи дека побарувачката за акциите била „исклучително голема“.

Најголемиот акционер - данската влада, која поседува 50,1 отсто од компанијата - ја поддржа зделката, а норвешката енергетска компанија „Еквинор“ (Equinor ASA), втор најголем акционер, исто така потврди дека ќе го задржи својот 10-процентен удел.

Акциите на компанијата се урнаа за околу една третина кога во август беше објавено собирањето капитал. Помалку од две недели подоцна, вредноста на акциите повторно достигна ново најниско ниво, откако администрацијата на Трамп нареди запирање на работите на ветерниот парк „Револушн винд“ (Revolution Wind), кој „Орстед“ го гради крај брегот на Род Ајленд.

Но „Орстед“ поднесе тужба за блокирање на наредбата и со судска одлука ѝ беше дозволено да продолжи со проектот. Оттогаш, акциите на компанијата забележаа нагло закрепнување и во понеделникот попладне достигнаа 122,35 дански круни – околу 27 отсто повеќе од најниската вредност по наредбата за стопирање на проектот.

Иако САД долго време беа гледани како клучен пазар за раст на компанијата, тој амбициозен настап ѝ се врати како товар. Брзиот раст на трошоците и проблемите во синџирот на снабдување ја натераа „Орстед“ да откаже два големи проекта во Америка, а администрацијата на Трамп подоцна го стопираше и проектот на норвешката „Еквинор“.

И покрај тоа што и тој ветерен парк подоцна доби зелено светло, честите политички пресврти ја разнишаа довербата на инвеститорите во секторот, што ѝ отежна на „Орстед“ да продаде удел во проектот „Санрајз винд“ (Sunrise Wind) крај брегот на Њујорк. Така во финансиската конструкција на компанијата се појави празнина што сега се обидува да ја надомести со свеж капитал од инвеститорите.

Со новособраните средства, „Орстед“ очекува да се најде во силна позиција за да реализира низа проекти што се веќе во тек во САД и Европа до крајот на 2027 година. Компанијата планира во наредните години да заврши два големи американски проекта, по што ќе го насочи фокусот кон поразвиениот и постабилен европски пазар на офшор ветерна енергија.

Понудата на права за купување акции претставува форма на зголемување капитал, со која на постојните акционери им се нуди можност да купат акции по пониска цена, во сооднос со нивните сегашни удели. На тој начин тие можат да ги искористат своите права и да избегнат разводнување на сопственоста или, пак, да им ги продадат на други инвеститори.