Топ 20 компании со најголема добивка по акција

„Макпетрол“ се најде на првото место на листата компании од Македонската берза рангирани по остварената добивка по акција во првата половина од годинава со заработка по акција од 4.371 денар. Нашата анализа на полугодишните берзански податоци донесе и своевидни изненадувања со оглед на тоа што на второто и на третото место на оваа листа се најдоа „БИМ Свети Николе“ и „Нова стоковна куќа Струмица“ со остварена добивка по акција од 2.802 односно 2.369 денари во периодот јануари-јуни 2022 година.

Меѓу првите десет компании рангирани по овој показател нема други големи изненадувања. На четвртото и петтото место се „Реплек“ (добивка од 1.636 денари по акција во првите шест месеци од 2022) и НЛБ Банка (1.633 денари). Понатаму следуваат „Фершпед“, „Пекабеско“, „Прилепска пиварница“, „Грозд Струмица“ и „Окта“.

Анализата на „Блумберг Адриа“ откри дека добивката по акција во првото полугодие од 2022 година кај некои компании е поголема отколку остварената добивка по акција во целата 2021 година, што може да сигнализира очекувања за подобрување на финансиските резултати на овие компании годинава. 

Од овој аспект, во однос на останатите отскокнува „Нова стоковна куќа Струмица“ чијашто добивка по акција во првите шест месеци од годинава од 2.802 денари е неколкукратно повисока отколку реализираната добивка по акција од 133 денари за цела 2021 година.    

Таков е примерот и на „Дебарски бањи-Цапа“ со остварена добивка по акција од 611 денари во првата половина од годинава споредено со добивка по акција од 119 денари за 2021 година. Уште еден таков пример е „Окта“ која во првите шест месеци од годинава има добивка по акција од 900 денари, што е двојно повеќе од остварената добивка по акција од 446 денари за 2021 година.

Од друга страна, забележително е дека добивката по акција не значи истовремено зголемено тргување со одредени акции што најверојатно се должи на акционерската структура и интересот на инвеститорите да ја задржат сопственоста во компаниите.  

Така, последното тргување со акции на „Нова стоковна куќа Струмица“ било на 19 октомври, минатата година кога биле продадени 10 акции за 615.000 денари.  Слична е состојбата и кај „БИМ Свети Николе“ каде последно тргување со акции од компанијата било на 8 ноември, минатата година кога во една трансакција биле продадени 16 акции за 248.800 денари.

Спротивно на тоа, многу поредовно се тргувало со акции кои имале помала добивка. На пример, во изминативе 52 недели имало 7.415 трансакции со акциите на Комерцијална банка во кои биле продадени 192.486 акции и остварен промет од околу 2,2 милијарди денари. Во овој период минималната цена на акциите на банката биле 9.746 денари, а максималната 13.300 денари. Уште еден таков пример е „Алкалоид“. Во последните 52 недели во 3.564 трансакции биле истргувани 55.199 акции од компанијата и бил остварен промет од 973 милиони денари. Акцијата на „Алкалоид“ во овој период имала минимална цена од 15.987 денари, а максимална цена од 19.400 денари.