Акциите на „МетаЕкс“ скокнаа 693 отсто по рекорден интерес при излегувањето на берза

„МетИкс“ (MetaX Integrated Circuits Shanghai Co.) забележа силен раст уште на првиот ден од тргувањето во средата, што претставува најново во низата исклучително успешни берзански дебија на кинески производители на чипови, по сличните добивки на „МТТ“ (Moore Threads Technology Co.) претходно овој месец.

Акциите на „МетИкс“ скокнаа 693 отсто во Шангај, откако компанијата собра 585,8 милиони долари при излегувањето на берза. Со овој раст, „МетИкс“ оствари најуспешно берзанско деби во Кина во последната деценија меѓу компаниите што собрале меѓу 500 милиони и една милијарда долари.

Како и „МТТ“, „МетИкс“ произведува графички процесорски единици за развивачи на вештачка интелигенција — индустрија што доживува забрзан раст, поттикната од сè поширокото прифаќање на ВИ-услугите од страна на потрошувачите и компаниите. Се очекува акцијата да привлече и инвеститори кои не успеале да добијат удел во особено тешкиот процес на распределба на акции при излегувањето на берза.

„МетИкс“ ги надмина конкурентите со најсилно берзанско деби

Bloomberg

Акциите беа запишани 2.986 пати повеќе во делот наменет за малите инвеститори, што претставува уште поголема побарувачка од онаа кај „МТТ“, чии акции беа запишани 2.750 пати повеќе од понуденото.

Инвеститорите се обложуваат на таканаречени национални шампиони, кои би можеле да се наметнат како одржливи домашни конкуренти на глобалниот лидер „Енвидија“ (Nvidia Corp.), чии најнапредни чипови, поради американските ограничувања, не смеат да се продаваат во Кина. „МТТ“ забележа раст од повеќе од шест пати во осум трговски сесии по излегувањето на берза, при што акцијата се зголеми речиси петкратно само во првиот ден од тргувањето.

Акциите на „МетИкс“ во иницијалната јавна понуда беа ценети на 104,66 јуани по акција, а по скокот пазарната капитализација на компанијата надмина 332 милијарди јуани. За споредба, тековната пазарна вредност на „МТТ“ изнесува околу 336 милијарди јуани. Кај „МетИкс“, односот меѓу пазарната вредност и остварените приходи изнесува 56,4, што значи дека компанијата на берза се вреднува на 56 пати повеќе од своите годишни приходи. Тој однос е значително понизок од просекот кај конкурентите, кој изнесува 127,4, како што се „Камбрикон“ (Cambricon Technologies Corp.) и „АМД“ (Advanced Micro Devices Inc.), покажува берзанската пријава на компанијата.

„Политиката на замена на странските чипови со кинески домашни производи ќе продолжи да поттикнува силен раст кај овие компании и има значителен потенцијал неколку од нив да достигнат пазарна капитализација од околу еден билион јуани“, изјави Жанг Кексинг, партнер во „Пекинг ГАМЦ“ (Beijing Gelei Asset Management Center Limited Partnership).

Котирањето на „МетИкс“ следи по големите добивки кај кинеските производители на чипови

Bloomberg

Одличниот настап придонесе за поширок раст на секторот, при што индексот STAR 50 Index, кој е силно застапен со чип-компании, порасна за 2,5 отсто. Индексот ChiNext напредуваше за 3,4 отсто, при што најголем добитник беше „Еоптолинк“ (Eoptolink Technology Inc.), чија акција достигна рекордно високо ниво.

Берзанското деби на „МетИкс“ се надоврза на динамичен ден за котирања на азиските пазари во средата. Освен „МетИкс“, со тргување на своите пазари започнаа и најголемата лиценцирана криптовалутна берза во Хонг Конг „ХашКи“ (HashKey Holdings Ltd.), јапонската „СБИ Шинсеј Банк“ (SBI Shinsei Bank Ltd.), како и индонезиската дигитална банкарска компанија „ПТ Супер Банк Индонезија“ (PT Super Bank Indonesia).

„МетИкс“ ги влече своите корени од „АМД“, при што тројца клучни членови на основачкиот тим претходно работеле за американскиот производител на чипови. Меѓу нив е и претседателот и главен извршен директор, Чен Веилијанг.

Кинеската компанија дизајнира и продава графички процесорски единици (ГПУ) што се користат за ВИ-оптоварувања, како и за графичко рендерирање во гејмингот и други визуелизациски апликации. Во 2024 година, серијата „Шјијун Ц500“ (Xiyun C500), фокусирана на ВИ, за која компанијата тврдеше дека е споредлива со A100 на „Енвидија“ (Nvidia Corp.), учествувала со речиси 98 отсто во вкупните приходи. Поновата генерација „Ц588“ (C588), значително го намалила јазот во перформансите во однос на „Х100“ (H100) на „Енвидија“, наведува „МетИкс.

„МетИкс“ лани зазела околу 1 отсто од кинескиот пазар на ВИ-чипови, се наведува компанијата, повикувајќи се на податоци од индустриска консултантска куќа.

Кинеските иницијални јавни понуди годинава се покажаа силни, со просечен раст од 250 отсто на првиот ден од тргувањето, според податоци од „Блумберг“. Дел од причините се и напорите на кинеските власти да го ограничат бројот на издавања, со цел да не се наруши ликвидноста на поширокиот пазар.

Во меѓувреме, послабиот апетит за ризик на секундарниот пазар во претходниот период, како и прибирањето добивки на крајот од годината, дополнително го зголемија интересот за нови понуди, кои се гледаат како сигурен начин за остварување добивки во првите денови од тргувањето. Производителот на радиофреквентни чипови „Пекинг ОЕ“ (Beijing Onmicro Electronics Co.) повеќе од двојно ја зголеми вредноста на акциите на своето берзанско деби во вторникот, по ИПО што беше запишано 2.899 пати повеќе од понуденото.

Меѓу другите производители на чипови кои потенцијално би можеле да котираат во Кина се „Чанг Шјин“ (ChangXin Memory Technologies Inc.) и „Јангце Мемори“ (Yangtze Memory Technologies Co.). Двете компании поединечно би можеле да бараат вреднување од 200 до 300 милијарди јуани.

Во Хонг Конг, низа компании од областа на вештачката интелигенција исто така се подготвуваат за излегување на пазарот. „МиниМакс“ (MiniMax) и „Жипу“ (Zhipu), поддржани од „Алибаба“ (Alibaba Group Holding Ltd.), „Тенсент“ (Tencent Holdings Ltd.) и други инвеститори, имаат цел да ги завршат своите ИПО уште во јануари.

„Котирањето на ‘МетаИкс’ би можело да предводи раст на технолошките акции и да создаде дополнителен ентузијазам околу новите и секундарните берзански понуди“, изјави Сју Давеј, фонд-менаџер во „Џинтонг ПФМ“ (Jintong Private Fund Management) од Пекинг.