.webp){kind=icon}
Струшката компанија Илинден АД за една година, втор пат добива милионски државен тендер. Откако лани во октомври Јавното претпријатие за државни патишта ја одбра да го гради регионалниот пат Р2246 на делницата од Извор до Гарски мост за 23,7 милиони евра, месецов повторно истото јавно претпријатие склучи договор со Илинден АД. И повторно е вреден над 23 милиони евра или е втор најголем во историјата на јавните набавки на ова Јавно претпријатие од 2008 година. Прворангиран по вредност, пак е токму тој што беше склучен лани.
Годинава, на 7 септември, Јавното претпријатие за државни патишта со Илинден АД Струга склучило договор за рехабилитација и поправка на државните патишта во годината што следува, односно во следните 12 месеци. Носител и потписник на договорот е струшката компанија, но во рамковната спогодба учествува заедно со струмичката компанија Жикол и со Друштвото за градежништво трговија и услуги, Еуровиа од Желино.
Договорот е со максимална цена од 23 милиони евра, а ќе се реализира по потреба, во зависност од состојбата на патиштата.
Инаку работата ја добила на тендерот на кој се јавиле четири други фирми од кои најголемата е Гранит. Критериумот по кој е одбрана е најниската цена.
Од 2008 година оваа компанија, е добитник на повеќе државни тендери, меѓу кои најголем од нарачетелите е секако Јавното претпријатие за државни патишта. Во претходните години поголеми работи добивале од институции во Охрид и Струга. Сепак Илинден АД Струга не е единствената компанија која добива милионски договори од претпријатието за патишта, иако секако со овие последни два, е компанија број еден по вредност на договорите.
Со Јавното претпријатие за државни патишта сега директорува Ејуп Рустеми, поранешниот директор на Македонски пошти.
