Трговците со метали изгубија најмалку 144 милиони долари по бегството на Шапката од Кина

Кинеските трговци со метали претрпеа загуби во вкупен износ од најмалку 1 милијарда јуани (144 милиони долари), откако еден од нивните партнери побегнал од земјата оставајќи ги зделките недовршени, што ги вознемири највисоките регулатори загрижени за скриени финансиски ризици, велат лица запознаени со случајот.

Во срцевината на кризата е трговска мрежа што ја посредувал Шју Маохуа, дилер на метали со прекар Шапката, рекле изворите, меѓу кои има и луѓе што работеле со него или имале деловни односи и директно се погодени од загубите. Државно поддржаната компанија „СДИЦ Комодитис“ (SDIC Commodities Co.) била најпознатата компанија вмешана во случајот, тврдат добро упатени анонимни извори. 

Шју ѝ должел пари на компанијата за испораки на бакар и други метали, а таа, пак, им должела на своите доставувачи, појаснуваат изворите.

Во соопштение до берзата од страна на компанија поврзана со случајот се наведува дека последиците вклучуваат и една тужба против „СДИЦ Комодитис“ за над 200 милиони јуани отштета, како и сметки за кои тужителот тврди дека останале неплатени. Фирмата досега не реагирала јавно.

Кинеската влада во последниве години сè почесто има негативен став кон компаниите за кои смета дека се впуштаат во ризични деловни практики што го загрозуваат уредното функционирање на пазарите. Тоа особено важи за државните претпријатија што директно ги надгледува, на кои им било укажано да не излегуваат надвор од нивните основни дејности. Компаниите што тргуваат со суровини се под засилено внимание поради низа скандали во овој често нетранспарентен сектор.

Регулаторите особено се вознемирени од таканареченото кружно тргување, кога компаниите меѓусебно купуваат и продаваат ист имот за да создадат илузија дека е остварен приход. Изворите велат дека СДИЦ и други фирми најверојатно изгубиле пари откако Шју исчезнал, бидејќи неговото заминување фактички ја прекинало трговската врска што траела со години.

Шју не одговорил на барањата за коментар испратени преку неговите профили на социјалните мрежи, ниту преку блиски деловни контакти што сè уште се во Кина. „СДИЦ Комодитис“ е трговска единица на Државната корпорација за развој и инвестиции (State Development & Investment Corp.), државен конгломерат со годишни приходи од речиси 200 милијарди јуани. Матичната компанија, со која било контактирано по телефон, одбила да коментира во име на својата подружница.

Иако нема официјален вкупен износ на загубите што ги претрпеле компанијата и другите трговци и банки поврзани со Шју, процените од луѓе директно вклучени во зделките сугерираат дека тие би можеле да изнесуваат најмалку 1 милијарда јуани. Некои од изворите веруваат дека сумата може да биде многу поголема, имајќи го предвид обемот на трансакциите во кои биле вклучени или кои ги следеле во текот на повеќе години.

„Гуангдонг Пролто“ (Guangdong Prolto Supply Chain Management Co.), трговец од Шенжен, ја тужел СДИЦ за 219 милиони јуани откако компанијата не платила целосно за испораки на метален концентрат, се наведува во берзанско соопштение од декември. „Пролто“ одбил да коментира за случајот.

Според лица запознаени со случајот и судски документи во кои има увид „Блумберг“, суд во Тјанџин, пак, запленил 3.150 тони рафиниран бакар што единицата на СДИЦ го чувала во складиште во Вушји, во покраината Џијангсу, по барање на кинеска државна развојна банка. Бакарот бил замрзнат за да се зачуваат средствата на трговецот во случај на судска постапка, посочуваат изворите.

Фиктивен метал

Шју, чие име на мандарински значи „шапка“ и кој го користи тој прекар како свое име на Вичет, бил клучна фигура во мрежата што ѝ помогнала на подружницата на СДИЦ да ја зголеми продажбата, тврдат дури шест лица што претходно работеле со него. Тоа, како што појаснуваат тие, било постигнато преку нерегуларни зделки што ги заобиколувале владините правила, кои ги ограничуваат државните фирми да тргуваат само со суровини неопходни за нивните основни операции. Матичната компанија на „СДИЦ Комодитис“ управува со електроцентрали во Кина и е вклучена во иницијативата „Појас и пат“ на претседателот Шји Џјинпинг за изградба на инфраструктура низ целиот свет.

Од својата база во Фошан, во покраината Гуангдонг, Шју бил посредник што управувал со повеќе компании што купувале метали од топилници или од други трговци, а потоа им ги препродавале пратките на државни претпријатија, велат негови соработници. Дел од договорите бил и ангажманот товарот да биде повторно откупен на подоцнежен датум.

Шју можел речиси веднаш да заработи пари од тргувањето, продавајќи ги фактурите од своите државни клиенти, рекле изворите. Компании што нудат факторинг-услуги, вклучувајќи и некои банки, ги купувале фактурите со попуст уште пред да се извршат испораките на метал.

Наводната шема опфаќала и метали што тој всушност немал право да ги продава, додека многу од компаниите вклучени во трансакциите биле во негова сопственост, откриваат неколку лица што соработувале со него.

Кинеските пазари за метали во последниве години беа погодени од низа скандали, од банкротот на најголемиот увозник на бакар во земјата до фиктивни резерви од алуминиум што предизвикаа загуби од над 1 милијарда долари. Во тој случај еден трговец минатата година беше осуден на доживотен затвор.

Во случајот на Шју некои од луѓето што го познаваат и тргувале со него велат дека неговата финансиска состојба почнала да се влошува откако направил погрешен облoг дека цената на среброто ќе падне. Облогот завршил неуспешно и, според нив, тоа можеби го натерало да ја напушти земјата. Цената на среброто во последните неколку месеци двојно се зголеми.

Шју е добро позната фигура на кинеските пазари за метали. Роден е во 1972 година во Бајин, град во северозападната покраина Гансу, и дипломирал на Севернокинескиот универзитет за технологија во Пекинг. Кариерата ја започнал со тргување со рециклирани метали во Гуангдонг, пред да се прошири кон рафинирани метали и концентрати од бакар и цинк до индиум, брифираат анонимни извори. 

Според нив, загубите што Шју ги оставил зад себе го привлекле вниманието на кинескиот надзорен орган за државни средства, кој во последните недели им наложил на големите компании за тргување со суровини под негова надлежност да ги преиспитаат своите активности и да ги укинат споредните операции што се користат за вештачко зголемување на приходите. Секое повлекување на државните претпријатија би можело значително да ја намали ликвидноста на пазарот, додавајќи притисок врз помалите играчи, велат тие.

Комисијата за надзор и администрација на државните средства не одговорила на телефонски повик и електронска порака со барање за коментар.

Ограничувањата првпат биле воведени во 2023 година, делумно поттикнати од должничка криза во државна компанија од секторот за дрвна индустрија, но нивната примена била нерамномерна. Забавувањето на економијата, велат изворите, ги поттикнало државните компании да бараат алтернативни извори на приходи.