Германија заработи 760 милиони евра од продажба на уделот во Луфтханза

Германија заработи вкупно 760 милиони евра од продажбата на својот сопственички удел во авиопревозникот Луфтханза. Тоа беше своевидно привремено преземање на сопственички удел за да може авиокомпанијата да се одржи во воздух во текот на кризниот пандемиски период.

Германскиот државен фонд за економска стабилизација (WSF, Wirtschaftsstabilisierungsfonds), го продаде уделот од 9,92 проценти сопствеништво на најголемата европска авиокомпанија на институционалните инвеститори преку аукција.

„Вкупните приходи од 1,07 милијарди евра, што WSF ги генерираше преку продажбата на својот удел, значајно го надминаа износот од 306 милиони евра, колку што беа инвестирани кога се презеде уделот. Разликата е дури 760 милиони евра“, изјави Јута Денгес, оперативна директорка на финансиската агенција WSF, додавајќи дека „со таквиот исход учеството на WSF во компанијата престанува и таа повторно е целосно во приватни раце“.

Последните случувања поврзани со Луфтханза се дека најбогатиот човек во Германија, Клаус Михаел Куне, сопственик на бизнис со логистика, најави зголемување на својот удел во авиокомпанијата. Тој сега поседува 15,01 проценти од акциите.

Компанијата претходно направи договор со пилотите за покачување на платите, но за возврат тие имаат забрана за штрајк во следната година. Најголемата европска авиокомпанија во последно време се бори со незадоволните вработени, поради што се предизвикаа многу турбуленции во и без тоа критичната сезона на летни патувања.

Во моментов нема коментари за веста. Биди прв да коментира...

Остави коментар