Уште еден мегадоговор: „Антропик“ на чекор до на инвестиција од над 20 милијарди долари

„Антропик“ (Anthropic PBC) ги усогласува финалните детали за финансирање што веројатно ќе надмине 20 милијарди долари и би можело да се затвори уште следната недела, велат лица запознаени со случајот.

Ривалот на „Опен еј-ај“ (OpenAI) првично бараше 10 милијарди долари, но сега е на пат да собере повеќе од двојно поголем износ, при вреднување од 350 милијарди долари, делумно благодарение на силниот инвеститорски интерес, потенцираат добро упатените извори, кои побарале да останат анонимни бидејќи деталите се доверливи.

„Антропик“ во најновото финансирање обезбедил поединечни вложувања поголеми од една милијарда долари од „Коту Менаџмент“ (Coatue Management), сингапурскиот „ГИЦ“ (GIC) и „Ајконик“ (Iconiq Capital), како и до 15 милијарди долари од стратешките инвеститори „Енвидија“ (Nvidia Corp.) и „Мајкрософт“ (Microsoft Corp.), објави претходно Блумберг њуз.

Последното финансирање речиси ќе го удвои претходното вреднување на „Антропик“ и доаѓа само по пет месеци откако компанијата собра 13 милијарди долари, сигнал за инвеститорска еуфорија поттикната од забрзаниот раст на приходите на стартапот за вештачка интелигенција, кој лани летото надминаа девет милијарди долари на годишно ниво.

Според изворите, договорот сѐ уште не е официјално затворен, а роковите и конкретните услови може да се променат. Се очекува во финансирањето да учествуваат и „Алтимитар“ (Altimeter Capital Management) и „Секвоја“ (Sequoia Capital), двата поддржувачи на „Опен еј-ај“. Во рундата учествуваат и „Лајтспид“ (Lightspeed Venture Partners) и „Менло“ (Menlo Ventures).

„Антропик“ одби да коментира за договорот.

Компанијата зад себе има исклучително успешна недела, откако претстави нов модел на вештачка интелигенција оптимизиран за автоматизација на работни задачи во претпријатијата, што предизвика распродажба вредна повеќе милијарди во софтверскиот и финансискиот сектор. Во изминатата година, кодерските агенти на „Антропик“, кои можат да пишуваат софтвер со минимален човечки ангажман, станаа алатка што масовно ја користат компании и развивачи.

Кодерските способности на „Антропик“ се гледаат како потенцијален почеток на нова ера на автономна ВИ-технологија што се користи на работното место, а инвеститорите се обложуваат дека алатките на компанијата ќе имаат слично влијание и во други сектори на економијата.

Најновото финансирање на „Антропик“, како и планираната понуда за откуп на акции од вработените, се договараат паралелно со разговорите на конкурентот „Опен еј-ај“ за прибирање до 100 милијарди долари во уште една рекордна рунда финансирање за ВИ. Двете компании годинава презедоа и чекори кон иницијална јавна понуда на акции.

Додека вреднувањата на ВИ-компаниите нагло растат, компаниите се соочуваат и со загриженост околу огромните трошоци за дата-центри, чипови и талентот потребен за развој на технологијата, како и со кружниот карактер на дел од финансирањето што доаѓа од добавувачи како „Енвидија“ (Nvidia).