НЛБ со помала добивка, што вели Блаж Бродњак за работењето?

„НЛБ Групацијата“ (NLB Group) лани оствари 1,3 милијарда евра нето-приходи, што е за пет отсто повеќе отколку претходната година. Од оваа сума, нето-приходите од камати изнесувале 947 милиони евра и биле за еден отсто повисоки отколку во 2024 година, додека приходите без камати се зголемиле за 16 отсто, на 356 милиони евра. Од нив, нето-приходите од провизии изнесувале 343 милиони евра и во период од една година се зголемиле за девет отсто, соопштија од банката.

Банката ги намали вкупните трошоци за девет отсто во споредба со претходната година, додека нето-добивката изнесуваше 503 милиони евра и е пониска за два отсто во однос на 2024 година. Притоа, добивката во последниот квартал, во споредба со претходниот, се намали од 131,6 на 97 милиони евра, што претставува пад од 26 отсто.

„Иако помала отколку во претходната година, добивката на ‘НЛБ Групацијата’ по оданочувањето надмина половина милијарда евра трета година по ред, што ги потврдува високата успешност на работењето на Групацијата, солидниот раст на кредитите и отпорноста на деловниот модел и покрај притисокот врз маржите“, се наведува во соопштението на банката, која ја води Блаж Бродњак.

 

 

„‘НЛБ Групацијата’ покажува континуиран раст, а во 2025 година дури и двоцифрен, на своите клучни домашни пазари и во централните сегменти. Нето-приходите од камати се стабилизираа и почнаа да се подобруваат, при што ефектите од намалувањето на каматните стапки во билансот на успех и на билансните позиции во најголем дел веќе се апсорбирани, што претставува цврста основа за раст на приходите врз основа на понатамошно зголемување на обемот на работењето“, изјави Блаж Бродњак.

Тој додава дека, според стратегијата до 2030 година, „‘НЛБ Групацијата’ во својот фокус ги става клиентите, силно ги нагласува корисничкото искуство, целосната дигитализација на банкарските услуги и решенија и целосната автоматизација на деловните процеси“.

 

 

Најголемата банка во Словенија соопшти дека Групацијата минатата година забележала раст на кредитите од 14 проценти: „Поволните макроекономски услови, кои се одразуваат во ниската невработеност, зголемените приходи и повторното зголемување на приватните инвестиции, заедно со континуираниот раст на јавната потрошувачка, создадоа средина за силен раст на кредитите“. 

Притоа оттаму додаваат дека растот на кредитите во банките во Југоисточна Европа го надминал темпото на раст во Словенија.

Бруто-кредитите за компаниите и државата се зголемиле за 11 проценти во споредба со истиот период минатата година. Кредитите за физички лица забележале раст од 10 проценти, со забрзан раст на станбените кредити, поддржан од поголема продажба на нови кредити во текот на целата година.

Продажбата на нови станбени кредити во 2025 година изнесуваше 759,1 милиони евра, во споредба со 509,7 милиони евра во 2024 година. „Потрошувачкото кредитирање остана стабилно, што одразува континуирана побарувачка од домаќинствата, со 569,4 милиони евра нови потрошувачки кредити одобрени во 2025 година, наспроти 542,2 милиони евра во 2024 година. Во банките во Југоисточна Европа растот на кредитите го надмина темпото на раст во Словенија, со исклучително висок годишен пораст и кај населението, од 19 отсто, и кај кредитирањето на компаниите и државата, од 17 отсто“, додаваат од банката.

Обемот на депозитите на клиентите се зголеми на годишно ниво за 10 отсто, односно за 2.303,6 милиони евра, и достигна 24.509,9 милиони евра. Растот на депозитите продолжи и во четвртиот квартал, со благо сезонско зголемување на депозитите на домаќинствата врз основа на исплатите на награди на крајот од годината. „Каматните стапки за депозитите во текот на годината се намалија на ниво на целата Групација, во согласност со намалувањето на каматните стапки од страна на централните банки, а последното намалување беше реализирано на почетокот на јуни“, појаснија од банката.

Билансната сума на Групацијата, во споредба со истиот период лани, се зголеми за 12 отсто и изнесуваше 31,5 милијарда евра.

 

А што е со дивидендите?

Вкупните исплати кон акционерите во 2025 година изнесувале 257,2 милиони евра, што при цената на акцијата на крајот од годината претставува поврат од околу 7 отсто. За 2026 година очекуваат да бидат исплатени 55 отсто од минатогодишната добивка, што претставува зголемување на исплатниот сооднос за пет процентни поени. Притоа предупредуваат дека ова важи доколку не дојде до значајни спојувања и преземања.

Очекувања во 2026 година

Во 2026 година Групацијата очекува солиден раст на приходите, поддржан од продолжување на силниот раст на кредитите со високи едноцифрени стапки и стабилен амбиент на каматните стапки. Редовните приходи во 2026 година се очекува да надминат 1,3 милијарда евра.