Од јули директни летови од скопскиот аеродром до Алгеро и Палермо

Меѓународниот Аеродром Скопје ја проширува својата мрежа на дестинации со воведување на уште две нови авиолинии на „Виз ер“ до најголемите острови во Италија – Сицилија (Палермо) и Сардинија (Алгеро).

Од 15 јули стартува линијата од Скопје до Палермо, со која „Виз ер“ ќе сообраќа три пати неделно, секој понеделник, среда и петок, со достапни цени од 29,99 евра, а од 18 јули започнува рутата Скопје - Алгеро, која ќе лета два пати неделно, секој вторник и сабота со достапни цени од 39,99 евра.

Летовите до двете нови дестинации се планирани како сезонски линии, односно ќе се реализираат до 11 и 12 септември.

 „Пресреќни сме што ви го претставуваме возбудливото проширување на скопскиот аеродром. Ова проширување не само што ја збогатува нашата понуда, туку им овозможува на нашите ценети патници фантастичен избор на патувања и флексибилност полесно да ги планираат своите патувања. Со воведувањето на низа нови линии, гордо ја потврдуваме нашата посветеност на растот и иновациите, отворајќи врати за нови партнерства, културни размени и полесен пристап до динамичните европски пазари“, изјави Неџат Курт, генерален директор на ТАВ Македонија.

Вера Јардан, менаџер за корпоративни комуникации во „Виз ер“ вели дека овие нови рути ја одразуваат посветеноста на компанијата да им понуди на патниците повеќе опции за патување низ Европа. 

„Воодушевени сме што ја прошируваме нашата Македонска мрежа со воведување нови директни врски со Италија. Овој развој создава поголеми можности за патување за патниците, а воедно обезбедува и повеќе можности за одмор и градски одмор. Поврзувањето на патниците со живи дестинации отсекогаш било наша цел и сме благодарни за растечкиот број македонски патници кои го избрале ‚Виз ер‘“, рече Јардан.

Во моментов, „Виз ер“ нуди 45 линии до 41 дестинација во 17 земји од Македонија. Во 2025 година, авиокомпанијата реализираше повеќе од 10.000 летови од и кон земјата, превезувајќи речиси 2 милиони патници. Степенот на реализирани летови од 99,48 проценти е еден од највисоките во индустријата.

Со актуелниот зимски ред на летање, на Меѓународниот аеродром Скопје вкупно 15 авиокомпании оперираат летови до 50 дестинации, додека на Аеродромот Св. Апостол Павле во Охрид, 3 авиокомпании реализираат летови до 8 дестинации.

Со почетокот на летниот ред на летање, кон крајот на март, скопскиот аеродром ќе ја прошири својата мрежа на линии со уште две нови релации – кон Будимпешта и Неапол, додека охридскиот аеродром ќе добие нова линија до Милано. Во мај, „Аустријан ерлајнс“ ќе започне со летови од Охрид до Виена, а во јуни,„Виз ер“ ќе воведе уште две нови линии од Охрид до Катовице и Вроцлав.