„Ворнер Брос“ отвора нови преговори со „Парамаунт“, битката со „Нетфликс“ не е завршена

„Ворнер Брос“ (Warner Bros. Discovery Inc.) се согласи да ги обнови преговорите за продажба со ривалот „Парамаунт“ (Paramount Skydance Corp.), отворајќи можност за потенцијално ново натпреварување во понудите со „Нетфликс“ (Netflix Inc). Оваа одлука следува откако „Парамаунт“ го зголеми својот последен понуден износ, нудејќи 31 долар по акција, што претставува зголемување од еден долар по акција во однос на претходната понуда.

Во изјавата дадена во вторникот, „Ворнер Брос“ потврди дека оваа одлука е резултат на договорот за ослободување (waiver) со „Нетфликс“, кој ќе им дозволи на компаниите да разговараат за понудата на „Парамаунт“ во период од седум дена. Тоа значи дека „Ворнер Брос“ ќе има можност да ја разгледа новата понуда од „Парамаунт“, која не ја смета за „најдобра и конечна“ понуда. И покрај овие преговори, „Ворнер Брос“ и натаму ја препорачува оригиналната понуда од „Нетфликс“ за 27,75 долари по акција, со која компанијата планира да ги продаде своите студија и  стриминг-сервисот „Ејч-би-о макс“ (HBO Max).

„Ворнер Брос“ исто така најави дека на 20 март ќе одржи гласање на акционерите, кога се очекува акционерите да го одобрат договорот со „Нетфликс“. Во меѓувреме извршниот директор на „Ворнер Брос“, Дејвид Заслав, истакна дека компанијата целосно се фокусирала на максимизирање на вредноста за акционерите.

Последната понуда на „Парамаунт“, поднесена на 10 февруари, беше изменета со цел да реши некои од клучните забелешки на бордот на „Ворнер Брос“. Врз основа на договорот за ослободување со „Нетфликс“, „Ворнер Брос“ сега има рок до 23 февруари да ги разгледа условите на „Парамаунт“ и да ја побара најдобрата и конечна понуда од нив. Ако „Ворнер Брос“ во текот на овие преговори утврди дека понудата на „Парамаунт“ е подобра, „Нетфликс“ ќе има право да се изедначи со понудата на ривалот за да го задржи својот договор.

Додека преговорите се во тек, од „Нетфликс“ истакнуваат дека имаат потпишан договор, кој е поддржан од бордот на „Ворнер Брос“, и дека нивната понуда е единствената сигурна патека за остварување вредност за акционерите на „Ворнер Брос“. Платформата изрази уверување дека нивниот договор има јасен пат.

„Парамаунт“, кој има намера да ја купи целата компанија „Ворнер Брос“, инсистира дека неговата понуда е подобра за акционерите. Компанијата се согласи да ја покрие давачката кон „Нетфликс“ од 2,8 милијарди долари ако „Ворнер Брос“ го раскине договорот со нив, а понудила и гаранции за рефинансирање на долговите на „Ворнер Брос“. Понудата вклучува и компензација за акционерите на „Ворнер“ доколку договорот не се реализира до крајот на декември 2026 година, што ј истакнува увереноста на „Парамаунт“ во брзо одобрување на договорот од страна на регулаторите.