„Нетфликс“ под силна проверка од Министерството за правда на САД

Истражувањето на Министерството за правда на САД за предложеното преземање на „Ворнер брос“ од страна на „Нетфликс“ во вредност од 72 милијарди долари вклучува испитување на однесувањето на стриминг гигантот и дали тој ја користи својата моќ врз креаторите во преговорите за стекнување програми.

Министерството сака да утврди дали договорот „може значително да ја намали конкуренцијата или да создаде монопол спротивно на Секција 7 од Клејтон акт или Секција 2 од Шерман акт,“ според копија од граѓанското барање за истрага во кое имаше увид „Блумберг Њуз“.

Јазикот во барањето, административна судска покана која претходно не беше објавена, е најјасниот знак досега дека администрацијата на Трамп оди подалеку од стандардна ревизија на договори во истрагата за спојувањето, отфрлајќи го аргументот на „Нетфликс“ од последните недели дека владата не е ангажирана во ништо повеќе од типичен процес.

Широкиот опсег на прегледот е исто така силен показател дека ќе бидат потребни уште многу месеци пред владата да одлучи дали да го оспори договорот „Нетликс“ - „Ворнер Брос“ на суд - одложување кое може да му користи на конкурентниот понудувач „Парамаунт“.

„’Нетфликс’работи на исклучително конкурентен пазар. Секое тврдење дека е монопол или дека сака да монополизира е неоснована,“ изјави главниот правен директор на „Нетфликс“, Дејвид Хајман. „Ние ниту имаме монополска моќ ниту се занимаваме со такво однесување и со задоволство ќе соработуваме, како што секогаш правиме, со регулаторите за секоја нивна загриженост.“

Примената на двата закона има преседан, а истрагата можеби нема да резултира со федерална акција. Но ревизиите на договори обично ги спроведуваат американските антимонополски органи користејќи го само Клејтон акт, кој е специјален за истраги за спојувања. Шерман акт е закон кој почесто се користи за таргетирање на незаконска монополизација од страна на една компанија.

Министерството поставува прашања за способноста на „Нетфликс“ да ја искористи својата пазарна моќ во преговори со независни креатори на содржина како филмски студија и режисери, според изворите. „Нетфликс“ управува со најголемата платена видео стриминг услуга во светот и е еден од најголемите купувачи на филмски и ТВ програми во светот.

Компанијата троши околу 20 милијарди долари на програма оваа година, поделено меѓу оригинални серии и лиценцирани репризи. Многу од неговите најпопуларни оригинални програми се продуцирани од трети студија. Со купувањето на „Ејч-би-о“ (HBO) и „Ворнер брос“, „Нетфликс“ би стекнал едно од најголемите студија како и голем конкурент во стримингот.

„Волстрит џурнал“ прв објави дека прегледот на Министерството за правда ги вклучува деловните практики на „Нетфликс“ и дали договорот би му дал монополска моќ во иднина.

„Не сме добиле никакво известување ниту виделе друг знак дека Министерството за правда спроведува истрага за монополизација,“ изјави Стив Саншајн, шеф на глобалната група за антимонопол/конкуренција на компанијата која која го претставува „Нетфликс“.

Министерството за правда не одговори веднаш на барањето за коментар надвор од нормалното работно време. „Ворнер Брос“ одби да коментира.

Случаите за монопол можат да бараат концентрација на пазарот над 50 отсто, бројка која го надминува уделот на „Нетфликс“ со или без „Ворнер Брос“.

„Ворнер Брос“ оваа недела се обврза да ги продолжи разговорите со „Парамаунт“ откако претставник на компанијата укажа на подготвеност да ја зголеми понудената цена за 1 долар по акција на 31 долар. „Ворнер Брос“ му даде на „Парамаунт“ рок до 23 февруари да ја достави својата „најдобра и конечна“ понуда.