„Мета“ ќе потроши милијарди долари за опрема од АМД, ќе купува и акции

„Мета“ (Meta Platforms Inc.) ќе распореди опрема за центри за податоци со вкупен капацитет од 6 гигавати, базирана на процесори од АМД (Advanced Micro Devices Inc.), во голем договор што претставува значајна победа за обидите на производителот на чипови да го намали заостанувањето зад „Енвидија“ (Nvidia Corp.).

„Мета“ ќе купува чипови и компјутерски системи од АМД, наменети за извршување модели за вештачка интелигенција, во период од пет години, почнувајќи од втората половина на 2026 година. Вкупната вредност на трансакциите ќе изнесува „двoцифрен број милијарди“ долари по гигават, изјави извршната директорка на АМД, Лиза Су.

David Paul Morris/Bloomberg

Како дел од договорот, „Мета“ ќе добие налози за купување 160 милиони акции на АМД во фази, соопштија двете компании. Акциите ќе се стекнуваат кога проектот и цената на акцијата на АМД ќе достигнат одредени пресвртни точки, со што „Мета“ ќе стане еден од поголемите сопственици.

Договорот е најновиот чекор во масовниот бран на трошоци на „Мета“, сопственик на Фејсбук (Facebook) и Инстаграм (Instagram). Извршниот директор Марк Закерберг ја постави вештачката интелигенција како врвен приоритет на компанијата, ветувајќи дека ќе насочи стотици милијарди долари за агресивно предвремено зголемување на компјутерскиот капацитет.

Акциите на АМД пораснаа дури за 15 отсто во раното тргување, пред отворањето на пазарите во Њујорк. Акциите на „Мета“ пораснаа за 0,6 отсто.

Минатиот месец извршниот директор најави нова иницијатива наречена „Мета компјут“ (Meta Compute), фокусирана на изградба на „десетици гигавати во текот на оваа деценија и стотици гигавати или повеќе со текот на времето“, со цел да се обезбеди стратешка предност во однос на конкурентите.

Еден гигават ја претставува излезната моќност на нуклеарен реактор, доволно електрична енергија за напојување приближно 700.000 домаќинства.

Најавата сигнализира дека АМД држи чекор со поголемиот ривал „Енвидија“ (Nvidia Corp.), која минатата недела обелодени сопствено партнерство со „Мета“. Таа исто така покажува дека пошироката потрошувачка за опрема за вештачка интелигенција продолжува да забрзува, и покрај стравувањата на дел од инвеститорите од инвестициски балон.

За „Мета“, договорот со АМД ќе донесе компоненти приспособени на нејзините потреби. Компанијата исто така ќе има можност да влијае врз начинот на кој тие полупроводници ќе се дизајнираат во иднина.

„Нашите амбиции се навистина високи“, изјави Сантош Џанардан, раководител на глобалната инфраструктура на „Мета“, кој е задолжен за центрите за податоци на компанијата и нивната техничка архитектура. „Мета“ планира да продолжи со развојот на сопствени внатрешни чипови за вештачка интелигенција и ќе продолжи да купува од „Енвидија“, при што чиповите ќе се користат за поддршка на различни оптоварувања.

„Во обемот за кој зборуваме, има место за сите три“, рече Џанардан.

David Paul Morris/Bloomberg

Џанардан, кој сега директно му одговара на Закерберг, додаде дека компанијата сè уште нема одлучено кои од нејзините центри за податоци ќе ги користат новите чипови испорачани преку проширеното партнерство со АМД. Се очекува процесорите да помогнат во фазата на инференција кај вештачката интелигенција, моментот кога обучените модели се ставаат во практична употреба.

Извршната директорка на АМД, Лиза Су, изјави дека „Мета“, која веќе имала влијание врз дизајнот на чиповите на АМД, ќе добие приспособени верзии од претстојниот акцелератор МИ 450 (MI450), како и од неговите наследници. Можноста попрецизно да дефинира што ѝ е потребно била дел од причините зошто „Мета“ се обврзала на соработка со АМД, рече Џанардан.

„Она што сакаме да го направиме е да станеме големи и да забрзаме“, изјави Лиза Су од АМД. „Бевме на многу добар пат со ‘Мета’, но ова всушност ја подигнува нашата врска на следно ниво.“

„Мета“ веќе е втор најголем клиент на АМД и отсега ќе има сè поважна улога за растот на производителот на чипови. АМД лани пријави продажба од 34,6 милијарди долари и е на пат годинава да ги зголеми приходите за 34 отсто, според процените на Волстрит. Додавањето дури и на дополнителни 10 милијарди долари продажба би ги забрзало напорите на компанијата да добие поголем удел во однос на „Енвидија“.

И покрај растот, инвеститорите на АМД во последните недели стануваат поскептични во однос на изгледите на компанијата. Тие стравуваат дека фаворитите во ВИ-секторот нема да можат доволно брзо да се прошират за да ги оправдаат своите вреднувања. Откако акциите на АМД пораснаа за 77 отсто во 2025 година, годинава тие се во пад од 8,2 отсто.

Партнерството со „Мета“ претпоставува дека акциите на АМД се дури на почетокот на подолг раст. Некои од налозите на „Мета“ ќе се активираат само ако цената на акцијата достигне 600 долари. Акцијата во понеделникот затвори на 196,60 долари.