Значителен раст на добивката на „Алкалоид“ во минатата година

„Алкалоид“ АД Скопје во минатата година оствари консолидирана нето-добивка од 1,79 милијарди денари (29,1 милиони евра), што е зголемување од седум проценти во однос на претходната година кога консолидираната нето-добивка изнесуваше 1,68 милијарди денари (27,3 милиони евра).

Од компанијата информираа дека лани вкупните консолидирани приходи бележат раст од 11 проценти, а консолидираните расходи се зголемиле за 12 проценти.

Во периодот јануари-декември 2025 година во „Алкалоид“се реализирани 54 нови вработувања со што групацијата брои 3.018 вработени, од кои 2.234 се во земјава, а 784 се вработени во капитално поврзаните друштва во странство.

 

Бизнис-планот за 2026 година, донесен со одлука на Управниот одбор на „Алкалоид“ предвидува инвестирање на околу осум проценти од консолидираните приходи од продажби во материјални и во нематеријални средства, раст од седум проценти на консолидираните продажби во однос на реализираните во 2025 година, како и раст од 7 проценти на консолидираниот профит во однос на 2025 година.

„Бизнис-планот за 2026 година е базиран на очекувањата, проекциите и на можностите на тековните и на новите пазари и производи достапни за компанијата во моментот на изготвување на планот. Околностите и настаните во 2026 година, а со тоа и остварените резултати може да варираат во однос на прикажаните во бизнис-планот“, соопшти компанијата.